Favorito bagong OIC general manager kan CASURECO II

Kasunod kan amay na pagreretiro sa serbisyo ni Emelita Candia kan Hunyo 30, 2023 bilang general manager kan Camarines Sur II Electric Cooperative (CASURECO II) Inc., si Manzah J. Favorito iyo an pigdesignar kan junta directiva bilang OIC General Manager.

Sa laog kan sarong bulan na sick leave ni Candia kan Hunyo 2023 si Favorito iyo na an nagtutukaw na OIC kan Office of the General Manager, alagad idinagos na kan dating GM an saiyang amay na pagretiro asin si Favorito na an tinukahan kan junta poon Hulyo 3, 2023.

Sinabi ni Rinner Bucay opisyal na parataram kan cooperativa nin electricidad an mayor na dahilan kan ‘‘early retirement’’ kan dating GM huli sa ‘‘health reason’’ asin mayong katotohanan huli sa desisyon kan Energy Regulatory Commission (ERC) kan Abril 17, 2023 na nagsusugo sa manijamiento ibaba an sinisingil na halangkaw na tarifa hale sa P17.00 sagcod naghuros sa P11.29 cada kwh asin ‘‘refund’’ sa sobrang nakolecta sa miembros-consumedores.

Prueba kaini, an sinambit na isyu sa ERC poon pa kan taon 2015 mayo pa sa posisyon si Candia bilang GM asin andam an cooperativa magsunod sa ERC, sabi pa ni Bucay.

Si Candia nagtukaw sa halangkaw na puesto kan Casureco II sa laog nin limang taon matapos saiyang ribayan si dating NEA Project Supervisor/AGM Engr. Nelson Lalas.

Kan panahon kan dating GM pigdeclara kan NEA bilang triple A an categoriya kan cooperativa hasta na nagretiro sa serbisyo kan Hunyo 30, 2023.

An bagong OIC GM na taga Villa Grande Homes, Concepcion Grande, Ciudad nin Naga datihan na sa cooperativa mala ngani sa ngunian nasa ika-27 anyos na digdi an saiyang serbisyo.

Siya dating Board Secretary, pamayo kan records section, Supervisor Office of the GM asin executive secretary.

An mga opisyal asin rank and file kan cooperativa nagtutubod na dapat ‘‘insider’’ man giraray an maging permanteng GM.

An National Electrification Administration iyo an may pinal na desisyon sa pagpili kan permanteng GM hale sa tolong mga aplikante.

Alagad kinakaipuhan na ipublicar ngona sa peryodico an bakanteng posisyon. (DPA)