Festival asin events tampok sa Partido Area
Ni Sonny Malate
TIGAON, Camarines Sur --- Ngonian na yaon na sa New Normal an bilog na nacion, liwat na nagbabaskog an turismo sa ika-apat na distrito kan probinsya kan Camarines Sur o an Partido Area.
Sa mainland Partido, an kada banwaan digdi igua nin sadiring mga festival asin event na dakulaon na contŕibuente sa pagparambong kan turismo asin economia digdi.
Kan bulan na Pebrero, sa banwaan nin San Jose, liwat na piglansar an Harana Festival huli sa progresibong kaisipan ni Alkalde Jerold B. Peña. An okasyon nagmamawot na magtampok kan gawigawi kan pagranga kan puso kan babae sa paagi nin sonata nin pagkamoot hale sa lalaki.
Mga makolor na actividades an pigtampok na nagpahiling kan mayaman na cultura kan banwaan.
Sa laog kan bulan na Abril sunud-sunod na an mga makolor na actividades na kabarale sa man-iba-ibang okasyon. An Orgulyo kan Goa Festival asin an ika-216 na taon kan Foundation Day kaini an pinagsaro na sana. Ini may temang “Mga Suanoy na mga Kaugalian, I-orgulyo ta Ngonian” na nakatalaan gibohon sa Abril 18 - 25.
Mga maconsuelong pakawat an mahihiling arog kan sangkayaw competition, paghagot nin abaca, paglubid nin pisi, kurudkodan nin niyog asin iba pang bibo asin maconsuelong pacontest.
Cultural night presentation tampok sa ika-321 Founding Anniversary kan Tigaon, Camarines Sur
An Partido Baybayon Festval kan Abril 14 -16 sa Sagñay liwat man nakahatak nin mga local asin dayong mga bisita sa parteng baybayon kan barangay Santo Niño. Ngonian na taon an tampok na banda iyo an Agsunta na dinumog kan mga hubenes. An Partido Baybayon Festival bistado sa pagtampok nin mga sikat na musikero, artista asin performer na dinadagsa nin rinibong mga paradalan.
Sa Abril 17-23 sa banwaan kan Tigaon, icecelebrar an ika 321 Founding Anniversary kaini. Oficialmente, an foundation day kan Tigaon naitala sa Abril 20, 1702 sa pag-adal na ginibo ni Dr. Danilo M. Gerona. Ini mismo an aldaw na nagtugpa an bitis kan mga enot na missionero sa Tigaon.
Arog kan mga nakaaging taon, segun ki Algene Pelo Panoy, Municipal Tourism Officer, an celebrasyon na ilalatag kan local na gobyerno sa pangengenot ni Alkaldesa Chiqui B. Fuentebella, magigin makolor, bibo asin makahulugan. Ngonian na taon, an tema kan celebrasyon iyo an “Istorya kan Panahon, Satuyang Giromdomon.”
Sa banwaan kan Lagonoy, gigibohon an Lagonoy Samhod Festival magpoon Abril 25 hasta Mayo 1. Sa paagi kan celebrasyon na ini, orug pang namimidbid an samhod bilang de calidad na produkto sa One Town, One Product (OTOP) sa irarom kan Department of Trade and Industry.
Saro sa tampok sa celebrasyon iyo an art exhibit kan premyadong international artist, Mr. Pancho Piano, na gikan sa barangay Mangogon, Lagonoy, Camarines Sur.
Mientrastanto, an mga local na gobyerno sa mainland Partido naglalaom na an linyada kan mga actividades sa mga festival asin event sa mga banwaan digdi magigin dagdag na kagayonan na padagos na mahatak nin rinibong mga local asin dayuhan na turista.
An Partido Area bistado sa mga kadagatan, baybayon, waterfalls, isla asin dakol pang magagayon na mga lugar. Ini an padagos sa pagigin tourist destination, rason tanganing magin mabaskog an turismo digdi orug na kun bulan na tag-init.