Fiesta Kaidto, Fiesta Ngonian

Siempre an gabos nag babago ta an permanente sana sa kinaban iyo an pagbabago. Harayoon nang marhay kun ikukumparar an Penafrania Fiesta kaidto sa fiesta ngonian. Kan ako sarong announcer sa radyo DWRN sa pamamayo ni Atty. Celso Baguio na an studio yaon sa Queborac, nag attender ako sa pangapodan na consultation meeting ni naging Arsobispo Leonardo Legazpi. An Agenda, iyo an pag suhestion nin panibagong andas ni Our Lady of Penafrancia tanganing dai na usaron an tradisyonal na andas na mayong rueda imbes ini pig buburuligan kan mga devotos kaya inapod sinda kaidtong mga para bulig. Natatandaan ko si Mr. Mon Brilliante sarong peryodista, nagsuhestion na mag gibo nin Andas na iguang rueda tanganing dai na pag alsahon imbes itutulod na sana alagad tangani daang mahali an mga pag ringgaw sa burak ni Ina, an palibot kan andas kaganan nin mga wiring na iguang malanit asin nagpapa kibig-kibig na kuryente. Igua man nag suhestion na an andas na gibo sa mahalnas na yero arog kan nahihiling ngonian, dapat hapulason nin tambak na graza tanganing maghalnas arog kan kawat na palo-sebo. Sa pag ribayan nin mga koro-koro napag desisyonan iyo na ining presenting andas na mahalnas, malinig, makintab asin igua nin rueda, puede pang kaganan nin sadit na kwarto sa irarom na iyo an pahingaluan ni Padi. Nawara na an maka ngirit na “kulungan ng mga Lasing” na nakasunod sa andas ni Ina, kaya nagluluwas na huna mo mga layas na kabalang na sige an kurulambitay sa laog kan truck. Kaidto, an sakuyang mga tiyoon asin mga pinsan gikan sa Calolbon, Catanduanes Lunes pa sana nag aarabutan na para maki pamiesta bitbit an mga niyog, pulutan, asin sira. Nagbibiyahe sinda sa paagi kan pantalan sa Tabaco Albay. Natural dai na sinda nakiki pamiesta ngonian ta sinda mayo na sa kinaban. Deficil na ngonian an magpara pang imbitar sa Penafrancia ta grabe an sakripisyo ta sarado an mga tinampo, fully book an mga hotel, mayong malunadan ta aro-aldao an Parada sa Centro, makaherak an mga hale pa sa harayong lugar na bitbit an mga kaakian na nag hihiribe sa kapagalan sa paglakaw sa matahong lugar kan Naga. An mga kiritay kitay sa mga kalye saro nang dakulang Negosyo kan City Hall, ta an San Miguel, Coca cola, Pepsi asin iba pang kompanya, nagbabayad nin mahal makabitay sana kan saindang mga banderitas. Duwang Naguenio an nag imbento nin pagkaag nin mga kiritay kitay sa Centro kan Naga, an duwa iyo sinda Mr. Louie Ortega asin Dinaga Barangay Captain Casin. An dai nanggad nagba’go iyo an debosyon kan mga katoliko ki Inang Penafrancia ta haros sain man na lugar sa kainaban basta igua nin bikolano, igua man nin Traslacion asin Fluvial procession. An kafiestahan ni Ina, iyo an fecha nin pag tiripon tipon kan mga bikolano sain man na lugar sa interong kinaban. VIVA PENAFRANCIA !