‘‘Final security deployment’’ kan PNP CSur nakaandam na

An PNP Provincial Office kan Camarines Sur preparado na an saindang security deployment sa mga prescento sa 35 mga banwaan asin ciudad kan provincia nganing magtaong seguridad sa pirilian sa Mayo 12, 2025 mantang igua mang suhay na madedestino sa bulos kan trafico huli sa pagdagsa nin mga botantes.

Sa miting na pinangenotan ni Provincial Election Supervisor Atty. Noriel Badiola na ginibo sa Sangguniang Palalawigan kan Capitolyo Provincial, biniklad na ni Provincial Director Col. Virgilio Olalia Jr. an saindang final security deployment asin iba pang mga plano mantang igua na sanang apat na aldaw antes kan pirilian.

Madestino pa nin personajes sa pagdistribuer kan mga election paraphernalia asin Automated Voting Machines sa saindang destino.

Kabale sa ginibong miting kan Provincial Joint Security Control Center iyo QUAD Staff, FCs asin mga jefe de pulisya.

An mga jefe de pulisya kan provincia igua man ginibong mga pag-andam sa seguridad na afuera kan PNP yaon an personajes kan Fuersa Armada kan Filipinas (AFP) na iwawarak man sa bukid na mga barangay.

Sa Naga City Police Office, nagkaigua na kan saindang final security deployment sa mga voting centers sa 27 barangay kan ciudad asin mamantenir kan trafico.

Mientras tanto, nagpaluwas nin patanid an Comelec kan pinapaluwas na fake news sa social media na si mayong National ID, dai makakaboto sa midterm elections.

Sinabi kan Comelec na mayo sindang pinapaluwas na advisory na kun mayong national ID dai makakaboto. Pigriribong sana an publico mantang an dapat sanang ipresentar kan botante iyo an valid ID.

Hinagad pa na dapat dai magparatubod sa mga imposibleng informasyon o ‘‘fake news’’.

Mayo sindang pinaluwas na advisory na kaipuhan an national ID, sabi pa.

PAG-ANDAM SA PIRILIAN. Lt. Col. Ordonez Jr. asin Major Jesse Allan Go kan Naga City Police Office pinapaliwanag sa miembros kan PNP an saindang mga dapat gigibohon sa nakatalaan na midterm elections sa Mayo 12, 2025 nganing maseguro an paz y orden. (Retrato: NCPO)