Floating Motel



Kaidtong kadikit pa an tawo sa Naga City, malinaw asin malinig pa an salog kan Naga arog kan salog sa libmanan asin Sipocot na nag kokolor azul sa kagayonan. Digdi masagana an pag banwit nin sirang karpa na nag susubad sa paon na tinitiendang balisoso na gibo sa kamoteng kahoy. Saro sa mahigos na para banwit nin karpa diyan sa may bunuan nin orig sa likuran kan Supermarket, iyo an agta na si Ero’ tubong Buhi na nakikidagos sa sarong among sa Abella. Kada hapon, si Ero’ minatukaw sa gilid kan salog sa pantalan kan mga lantsa na biyaheng Libmanan para mag banwit asin an mga nag subad na karpa iyo man sana an etinitienda sa mercado. Bako lang si Ero’ kundi an iba pang mga para saguan nin baroto sa Naga asin Camaligan an nag dadakop nin sira gamit an pangke, tunay na ejemplo na malinig kaidto an Naga River, ta ini ngani naging tagbangan karigosan nin mga “divers” na daing kalson na kaakian sa may tulay kan Panganiban, Colgante asin Tabuco. Alagad iba man an naguno kong istorya hale ki Tony Balane (ADEN ’64) na kaidtong mga taon 60, nauso sa Naga River an Floating Motel o inaapod kaidto na Palutang nin Kaogmahan na an negocio iyo an salonan sa tubig kabaing kan mga night club sa Nordia. Sa Palutang nin Kaogmahan, naka lunad an mga “mahahamot na mga babae,na an mga nguso interong namumula sa pintura nin lipistik” mas bisto sinda sa apod na mga babaing nag papabakal nin halipot na kaogmahan. An Palutang nin Kaogmahan, gibo sa mga kawayan asin bareles tanganing maging barsa asin dai malubog sa tubig. An mga kwarto kaini gibo sa samil asin tiklad asin igua nin ilaw nin gazera asin nagdadalagan na tuninong mayong ribok ta dai nin makina imbes an timoner nag uusar nin halabang marobal na kawayan bilang tukon sa irarom kan salog. An Floating Motel igua nin duwang kwarto, an saro iyo an quarter kan mga babae, asin an sarong kwarto iyo an inaapod nindang karneseria ta diyan nagdudurog an customer asin an babae. Sa kadikloman na tahaw kan salog, nahihiling an balik-paduman na Palutang nin Kaogmahan asin minapundo sana ini kun igua nin subad, an subad iyo an apod sa customer na nagkakaway sa gilid kan Balintawak, Tabuco, Sabang, o Dinaga sinyal na iguang kustumer na malunad sa floating motel para mag bakal nin halipot na kaogmahan. Kadaklan sa mga customer, iyo idtong naka dyakpot sa mga pul-awotan, lucky 9 sa mga bilaran asin mga kagador sa merkado. Sa laog nin poco mas o menus sarong oras, ang lalaking customer ibabalik sa lugar na saiyang pig sakayan, ta duman siya bubuhian na risa sa lalawgon an kaogmahan ta ini nagtitilam tilam alagad interong maluluya an tuhold, ini pig aalalayan sa pag balyo ta ini maluluya an tuhod ta todo fuersa an mga babaing ipinaon saiya ta kadaklan daa digdi mga beterana sa edad na 40 paitaas kaya pig mamani mani sana ninda an pakikipag kawat sa mga lalaking nagugutom sa ngaran nin pagkamoot. An iba daa sa mga babae, may mga lima o walong aki. Masulong an Palutang sa mga low class customer sa ini reasonable an precio, ini maogmang experience ta iba an feeling kan magkasing-irog na yaon sa tahaw kan salog na garong arog kan pelikula harayo sa Salonan ni Leonora na kadakol paras sirip asin istorbo. An Palutang nin Kaogmahan sa salog bako ng bago ta ini pwedeng na arog sana man sa mga negosyanteng intsik sa China o duman sa Yuropa. Antes kang WWII iguang mas dakulang Floating Motel daa an nag lalataw-lataw sa Naga River. Base sa istorya ni Mr. Ramon Olano (President of Sumaro Bikolnon), kan siya aki pa, nag istorya an saiyang ina, na kaidtong pre-war, igwang dakulong lantsa na an pangaran “Banyek” pwedeng guno sa tataramon na instik. Ang Lanstang Banyek dakula asin mahiwas, dakol an kargadang mga seksing babae na mas mahibog an mga make up, asin lamo lamo nin pulbos o gawgaw an kili kili tanganing mahamot sinda sa mga kustomer. Igua kaidto nin dakulang pabrika sa Naga na yaon sa tongod kan Mercado sa balyo kan Tabuco Bridge, asin sa pabrika na idto kadakol nin mga tranbahadores na interong nagkukurahaw nin Coronita nin Banyek, sa oras na mina agi an lantsa na kargado nid mga babae. An boot sabihon daa kan mga trabahador iyo na an mga babae sa lantsa iyo an nagseserbeng saradit na korona bilang dekorasyon kan lantsa.


An siring na mga palutang nin mga salonera, paluhay-luhay na nawara kan an mga gilid kan salog ma okopar nin mga harong asin istaran nin mga tawo. Duman na sinda pig punan na paturonan nin gapo kan mga residentes na garong nababastos kan Palutang an kasagraduhan kan Naga River na bisto sa Fluvial para ki Inang Penafrancia.