Floor price sa paroy dai pa naiimplementar sa Bicol

Pili, Camarines Sur --- Yaon pa lang sa monitoring kan presenting presyo nin paroy an Department of Agriculture (DA) sa Bicol alagad mayo pa nin enforcement sa rehiyon sa pinaluwas na Executive Order No. 100 ni Presidente Ferdinand Marcos Jr.

An EO No. 100, pinirmahan ni Presidente Marcos kan Oktubre 25, 2025, nganing matabangan an mga paraoma sa paagi kan mandatory floor price kan paroy na P17 hasta P30 alagad depende sa calidad. Ini, para sa proteksyon kan paraoma sa hababang presyo kan paroy na binabakal kan mga negosyante o kumprada.

Ini an piglinaw kan DA Bicol sa paagi kan saindang opisyal na parataram, Lovella Guarin mantang hinahalat ninda an directiva hale sa saindang opisina sentral.

Alagad ngunian na mga bulan bako pang panahon nin aranihan asin naghahalat an paraoma na ma-implementar an floor price sa pagpoon kan aranihan sa bulan nin Mayo 2026.

Pasalamat an sektor paraoma sa EO 100 ni Marcos huli ta makakatabang sa saindang income sa tahaw kan ginigibo kan mga oportunistang negosyante na baratong an presyo kan saindang paroy kun mga bulan na gayo nin aranihan. Sa ngunian an presyo sa ibang mga kumprada sa Libmanan, Camarines Sur P15 hasta P17 alagad mayo paman nagpapatungod h ale sa paraoma, sa Partido area P11 hasta P12 mantang sa Calabanga asin pagtaraig na banwaan sarado an mga kumprado huli ta bako pang aranihan asin mayong pang pinapatungod na paroy.

An EO nagmamando sa DA asin National Food Authority bilang responsable sa pagpasunod kan ‘‘minimum buying price for palay’’ sa inisyal na presyo sa pag-ultanan kan P17 hasta P30 cada kilo defende sa calidad.

Binabasol kan sektor nin paraoma sa pagparabarato kan presyo huli sa Rice Tariffication Law na inaprubaran ni dating Presidente Rodrigo Duterte kan Febrero 1919.

Act Republica No. 11203 o Rice Tariffication Law na pinirmahan ni dating Presidente Rodrigo Duterte kan Febrero 15, 2019 padagos na kinukondenar kan sektor nin paraoma huli ta naging dahilan ini sa pagparabarato kan presyo kan paroy na mas napaboran an mga negosyantes. Poon na mag-epekto dakul na mga empleados kan National Food Authority nagkaharale sa trabajo asin pinaretiro nin amay sa serbisyo. An NFA ginibo nalang na magtungod nin paroy para sa food security.

Sa presenting administrasyon Marcos, sabi eemiendahan sa congreso an RA 11203 nganing masimbagan an agrangay kan paraoma alagad dai man nangyayari sagcod sana sa pangako.