‘‘Flying registrant’’ dai nalusot sa Brgy, SK eleksyon

An Commission on Election (Comelec) sa Ciudad nin Naga nagcierto na mayo nang nakalusot na ‘‘flying registrant’’ sa maabot na Barangay asin Sangguniang Kabataan (SK) eleksyon envez an mga hinarale sa listahan si dating mga votante na duwa hasta sa tolong veces nang dai nagboboto kan nakaaging mga eleksyon.

Natapos na si saindang ‘‘cleansing’’ asin si resulta nag-abot sa 1,085 an hinarale sa listahan kabale na digdi si mga yaon na sa abroad asin binawian nang buhay, sabi ni Election Officer Atty. Maico Julia Jr.

Sa eleksyon na pigtalaan sa Oktubre 30, 2023 igwa pang 120,685 na votantes.

Sinabi pa ni Julia imposible nang makalusot an ‘‘flying registrant’’ sa maabot na eleksyon mantang sa pagparehistro kan calificadong votante dapat mag-agi sa ‘‘finger print identification’’ nganing madaling mabisto asin madiscubre kan Comelec kun nagdubleng pagpalista nganing makaboto nin duwang veces.

Magigirumduman sa mga nakaaging eleksyon lokal igwang mga sombong na naghahakot nin votantes hale sa Ciudad nin Naga nganing magparehistro sa Comelec - Magarao, Camarines Sur mala ngani pig-protesta asin nahale sa listahan. An reclamong ini nangyari man sa Sipocot, Camarines Sur.

Pigtutubodan na igwang nasa likod na politico sa ‘‘flying registrant’’ asin sa maabot na eleksyon sa Oktubre 30, 2023 malinig na an sinambit na isyu.

Mientras tanto, maabot sa 987 mga paratukdo an nakatalaan na magserbe bilang electoral board members sa 329 precinto sa ciudad para sa pigtalaan na eleksyon.

Pig-aandam na kan Comelec an 329 classrooms na uusaron bilang mga voting precincts. (DPAureus)