Flying registrants sa Comelec maatubang caso kriminal

Maatubang nin perjury case sa corte an arin man na flying registrant oras na maprubaran nagputik sa pigpirmahan na sworn statement sa pagpalista bilang bagong votante sa sarong lugar.

Ini an patanid kan Commission on Election (Comelec) sa Camarines Sur sa tahaw kan reclamo sa media ni bise alcalde Boboy Macalino kan Sipocot, Camarines na nagdadakul an mga hinahakot na flying registrants hale sa mga barangay kan San Felipe, Pacol, Cararayan gabos kan Ciudad nin Naga asin igwa man hale sa Magarao asin Minalabac gabos kan Camarines Sur.

Alagad afuera kan caso kriminal, sinabi ni Abogado Maico Julia Jr. Election Officer asin opisyal na parataram kan Comelec Camarines Sur an saro sa amay na solusyon dapat cuestionon kan arin man na partido political an suspechadong mga flying registrant sa Election Registration Board (ERB) hearing nganing ibasura an saindang pagbalyo nin rehistro sa Comelec.

Pigbuyagyag ni Macalino na kan nakaaging April 29, 2021 apat na mga jeepney na pano-pano nin pasajeros an pig-osip sa saiya. An grupo kan magbaba sa apat na jeepney tolos nagderetso sa residencia kan sarong dating alcalde asin dai nahaloy nagpasiring sa opisina kan Comelec nganing magparehistro.

Kan hapoton kan pag-iriba kan bise alcalde kun sainda sinda hale, an simbag igwang hale sa Ciudad nin Naga, Magarao asin Minalabac mantang kan hapoton siisay an nagsugo sa sainda sinabi sana ‘‘si mayor’’.

Sinabi pa kan Comelec Camarines Sur an Election Officer mapadara nin noticia sa mga political party sa itatalaan na ERB hearing nganing kun igwang cuestion sa mga pigdududahan na flying registrants dapat magpresentar sinda nin evidencia nganing ibasura an saindang registration bilang transferee sa Sipocot.

An transferees dapat prubaran ninda na igwa na sindang anom na bulan na residency maging temporaryo man o permanente nganing maka-voto sa bagong prescinto.

Sinabi pa kan opisyal na parataram kan Comelec dapat maging vihilante an arin man na namamauan nganing madakop an mga pasaway na mapagamit sa politico.

Nagtutubod man an bise alcalde na posibleng bayadan nin sarong politico sa saindang banwaan an nasa likod sa paghakot nin flying registrants. (DPAureus)