FONDO HALE SA DA: Mga politico sa CS nag-“Epal’’ sapagbariwas ayuda sa paraoma

Nagpuon nang idistribuer an P5,000 sa mga paraoma na programa kan Department of Agriculture (DA) para sa Rice Farmers Financial Assistance na an fondo hale sa tariff revenue sa lindong kan programa kan Rice Tariffication Law (RTL) alagad nagkaperang mga politico nag-‘‘Epal’’.


An DA iyo an awtorisado sa pagpaluwas kan fondo alagad sa ginibong programa sa Capitol Convention Center sa Pili, Camarines Sur kan Febrero 3, 2022 presente an mga opisyales kan ahencia sa pamamayo ni Regional Executive Director Ronel Tornilla alagad igwa man sadiring programa an Capitolio Provincial an nagdistribuer kan ATM card sa mga paraoma pinangenotan ninda Gobernador Migz Villafuerte, 2nd District Congressman LRay Villafuere asin Luigi Villafuerte.


Nag-epal man si ibang mga candidato sa Camarines Sur, huli kaini biglang nawara an presencia kan regional executive director.


Dakul nang mga paraoma an nagrecibe kan ATM card nganing kubrahon ninda an P5,000 sa Land Bank of the Philippines na iyo an awtorisadong bangko kan DA alagad bako pa gabos na mga banwaan sa Camarines Sur.


An provincia igwang 9,840 benepisyaryo na nagpuon pa sanang mag-distribuer mantang an ibang mga provincia sa Bicol nakatapos nang ibariwas an ATM card.


Sa anom na provincia kan Kabikolan igwang total na 68,118 benepisyaro paraoma sa listahan kan Farmers Registry System for Basic Agriculture Services base sa data base.


Alagad napag-araman na an pagbariwas kan asistencia finansyal sa mga paraoma an gobierno provincial iyo an natalaan kaya yaon digdi an mga opisyales sa presencia kan opisyales kan DA.


An mga paraoma nagrereclamo sa Rice Tariffication Law kan presenteng administrasyon ni Duterte na naging causa kan pagparababa kan presyo kan paroy.


Alagad an mga higanteng negosyanteng bagas iyo an nakikinabang asin nag-aangkat nin bagas asin iyo pa an nagdidikta kan halangkaw na presyo sa mercado alagad si paroy kan paraoma bagsak presyo. (dpa)