Fondo sa Covid response sa 2022 budget ipapadagos

Dawa labi nang sarong semana mayo nang tinatamaan na caso kan coronavirus disease alagad dai hinale sa inaprubaran kan Sangguniang Panlungsod na P1.645 bilyon na 2022 annual budget kan City Hall an alokasyon sa Covid response.

Si Consejal Sonny Rañola, Chairman kan Committee on Health kan SP sa Ciudad nin Naga nagsabi sa saindang ginibong special session kan Miercules, Deciembre 22 nganing maaprubaran an 2022 annual budget maabot sa P82 milyon an saindang nakataganang fondo sa Covid response na Disaster Risk Reduction Management Fund dating inaapod na calamity fund.

Dai pang kasegurohan kun dagos nang matutunaw an Covid-19 sa tahaw kan padagos na pagbaba kan caso bako lang sa Naga maging sa Camarines Sur asin Kabikolan alagad kaipuhan andaman man giraray, sabi pa ni Rañola.

Kabale sa gagamiton kan fondo iyo an programa sa prevention, isolation, molecular laboratory, vaccines kun tutugotan na an LGU na magbakal nin sadiring bakuna nganing dai na mag-asa sa Department of Health.

Magigirumduman nabigla an lokal na gobierno kan pagparalangkaw kan caso sa Covid-19 kinulang nin fondo alagad mayong alokasyon envez kaipuhan gamiton an calamity fund.

Sinabi pa kan pamayo kan committee on health na puon sa Enero 2022 masikad na sa ciudad an booster shot dawa na ngani naabot na kan 27 mga barangay an herd immunity. An magiging prioridad man giraray digdi iyo an mga health workers, frontliners, senior citizens asin iba pa si dating pinapasunod kan national IATF.

Nagpatanid man giraray si Dr. Rañola sa publico na dai magtiwala dawa mayo nang Covid-19 kaipuhan magsunod sa mga health protocols mantang dai pa hinahale kan mga experto an homa kan virus asin yaon pa an omicron variant.(dpa)