Fondo sa flood control project hinale na-DPWH

Mayo nang flood control project na iimplementar an Camarines Sur 3rd Engineering District kan Department of Public Works and Highways (DPWH) kasunod kan desisyon ni Presidente Ferdinand Marcos Jr. na haleon na an fondo sa kaparejong proyekto sa tahaw kan mga controvercia sa ngunian matapos madiscobre an mga ghost project sa Bulacan asin posbileng sa iba pang provincia.

Ini an kumfirmasyon ni District Engr. Romeo Doloiras mala ngani sa saindang prosupuesto na pigsumiter sa oposina nasyonal para sa 2026 budget dai na ninda pig-ayon an flood control project.

Bako lang mangyayari sa 3rd congressional district kan Camarines Sur envez sa enterong mga engineering district sa nasyon kan obras publico.

Huli kaini, sinabi ni Alcalde Leni Robredo na apektado an saiyang hinahagad na fondo para sa kaparejong proyekto kasunod kan sinambit na controvercia nasyonal.

SA STORM DRAINAGE

Sa kaparejong entrevista ki DE Doloiras saiyang piglinaw an an gabos na nahamahan na storm drainage project kan saindang ahencia sa Ciudad nin Naga poon na i-turn over kan saindang opisina yaon na sa LGU an jurisdiksyon nganing iyo an maglinig nganing maibitaran an tubig baha.

Si City Engr. Elmer Albo kan ciudad pigtutukdo an DPWH iyo an dapat maglinig mala ngani poon na i-turn over sa ciudad dai lamang pigpapalinigan.

Sinabi pa kan DE na gabos na pig-turn over nindang storm drainage na sakop kan city road yaon na sa poder kan CEO. Kun mawot magpatabang sa obras publica magsabi lang bakong ‘‘magturokdoan’’.

Dai na dapat ‘‘magturokdoan’’ alagad kun iyan national road an DPWH an dapat maglinig, sabi pa. (Manny Basa)