Fondo sa LDF aarahiton nganing ibakal vaccines

Sararo an panindugan kan ejecutivo asin lehislatura sa Ciudad nin Naga na arahiton an gabos na natatada pang fondo kan Local Development Fund (LDF) nganing itagama sa pagbakal nin dugang na suplay nin bakuna contra sa Covid-19 para dai na maglaom sa pigsusuplay kan gobierno nasyonal.


Saro sa naging desisyon kan City Hall na gamiton muna an ibang fondo sa beautification project kan Plaza Rizal envez itagama sa fondo sa pagbakal nin bakuna.


Enot nang nagtagama nin P50 milyon an Sangguniang Panlungsod sa pamamayo ni Bise Alcalde Nene De Asis para sa Covid-19 vaccines asin nadagdagan pa ini nin cantidad P13 milyon hale sa P13 milyon na fondo para sa beautification project sa Plaza Rizal sagcod na igwa nang total na P63 milyon.


Ini an mga pahayag ni Alcalde Nelson Legacion mantang haros patingi-tingi an nag-aabot na Covid-19 vaccines hale sa national office kan Department of Health (DOH) mala ngani maabot palang nin labi sa 6 mil an natutudokan bakuna asin ini nasa 1.4 por ciento sa 231 mil na populasyon kan ciudad.


Alagad huli ta maabala pa an pag-abot nin vaccines na babakalon kan lokal na gobierno, sinda Director Francisco Sales kan Bicol Medical Center asin Alcalde Legacion pigpirmahan ninda an sarong surat na naghahagad sa DOH nin dugang na suplay.


Igwa nang babakalon nin enot na 50,000 doses nin bakuna alagad naghahalat na sana kan pag-abot sa masunod na bulan nin Hulyo.


Nakaulay na kan City Hall an supplier kan DistriPhil, awtorisadong vaccine distributor kan COVAXIN hale sa Bharat Biotech sa India.


Naghihinanakit na an ciudad sa gobierno nasyonal huli ta nalihisan na masuplayan nin dugang na bakuna apesar na igwa naman nag-abot nin dos milyon na doses kan Pfizer.


An Ciudad nin Naga pigpasa-irarum kan national IATF sa Modified Enhanced Community Quarantine (MECQ) puon kan Hunyo 16 hasta 30 alagad posibleng mapalawig pa.


Sa datus kan DOH Bicol an Naga padagos naglalangkaw an caso sa virus alagad dai naheheling kan gobierno nasyonal na tawan prioridad na suplayan nin dugang na vaccines. (dpa)