Fortuno



An solamenteng buhay na patron bako lang sa Naga asin Camarines Sur kundi sa bilog na Bicolandia iyo pa si Sal Fortuno.


Ginatos na mga broadcasters asin announcers sa radyo asin telebisyon an nag-aragui sa saiya bilang station manager asin trainor tanganing makanood nin efectivong komunikasyon sa aire.


Nagpoon bilang station manager kan DZGE, Filipinas Broadcasting Network (FBN) paka-graduar sanang high sa Ateneo kan dekada 60. Poon kadto nagparalangkaw an saiyang istatura sa broadcast industry. Kan siya maguin general manager kan FBN nasakop niya na an mga estasyones kaini sa Tuguegarao City, Lucena City asin Legazpi City.


Maski ngani may magayon na boses asin magayon na agom pero nungka siya maglangkaw nin boses ta garo dai naaanggot maski may mga pasaway na kabuhan.


Minsan pig-aapod siyang “Mr. Cool” kan kapwa broadcasters.


An naaanggutan kan saiyang among na si Senador Edmundo B. Cea, presidente kan FBN saiya tulos na naaareglo asin naibabalik an katuninongan asin marhay na iribahan.


Maski taga-Rinconada palibhasa naka-istar sa Canaman naguin director siya kan Casureco II bilang representante kan banwaan na Canaman, Magarao, asin Bombon. Tulos-tulos siyang napiling presidente kan pinaka-dakulang kooperatiba nin kuryente kan Bicolandia.


Sa pakisama mayong madaog saiya. Na-amigo niya si kadto Vice-Governor si Rolando Andaya Sr. kan Camarines Sur asin topnotcher Board Member Judge David Naval. Siya an pinaka-juven sa tolo. Dahil amigo niya an gabos na mga radio station managers napili tulos siyang chairman kan Kapisanan ng mga Broadcaster kan Pilipinas, Camarines Sur chapter, amay na parte kan dekada 70.


Siya man an nagtabang sa mga ordinaryong announcers na maka-mukna kan Association of TV and Radio Announcers of Camarines Sur(ATRACS) tanganing magka-burunyog an mga nasa rank and file, maguin professional sa saindang trabaho asin matawan nin halangkaw na sweldo.


Bistado an boses niya bilang newscaster, may kridibelidad, alagad dai nagkokomentaryo kaya mayo siyang kaiwal.


Kan siya imbitaran na magkandidadato bilang Board Member kan Camarines Sur, at- large, topnotcher tulos siya sa mga botantes kan Iriga asin 35 banwaan kan Camarines Sur.


Nagbokal pa siya sarong turno bilang representante sa Sangguniang Panlalawigan kan Rinconada District.


Pakatapos kadto kinua na siya bilang ViceGovernador asin naka-tulong turno tulos, pinaka-halawig sa estorya kan politika sa Camarines Sur. Kan magkandidato siyang congressman naka-apat siyang turno asin napagayon niya an tinampo sa Rinconada sagkod sa banwaan na Balatan.


Kaya kan pakandidatuhon niyang congresswoman si Mrs. Jocelyn Faustino Fortuno, an saiyang esposa, nanggana siya nin pinaka-dakulang abante sa kalaban niya asin may magayonon na performance bilang chairman kan Bicol Regional Economic Development (BRED) committee, senior member kan appropriations committee asin iba pang importanteng komitiba sa Camara de Representantes.


Kan sarong aldaw lang biglang nag-anunciar si Congressman Sal Fortuno na dai na siya madalagan sa 2022 for “health reasons” asin dai man mare-eleksyon si Congresswoman Josal Fortuno huli ta iyan an saindang pangako sa mga taga-Rinconada na matukaw nin sarong turno sana.


Nabigla an mga taga-media asin nakubhananan mga taga-Rinconada pati an bilog na Camarines Sur ta sa edad na 75 mabagsik pa si Sal Fortuno asin mismo si Congresswoman Fortuno. Magayon pati an saindang tandem, on the air asin off the air.


An hapot siisay daw sa mga taga-media sa Bikol na magkaka-igwa nin outstanding records and accomplishments kan mag-agom na si Sal asin Joe Fortuno?