‘‘FR’’ pigrecomendar magtukaw general manager kan MNWD

Antes magtapos an anom na bulan sa posisyon si Florencio Mongoso Jr. bilang acting general manager kan Metropolitan Naga Water Disitrict (MNWD) sa Ciudad nin Naga, igwa nang pigrecomendar sa junta directiva na calificado magtukaw bilang general manager.

Ini an pigbuyagyag sa Bicol Mail kan sarong opisyal kan MNWD na habo nang magbuyagyag kan saiyang pangaran alagad pigsabi sana an may inisyal na ‘‘FR’’.

An acting general manager nagkumfirmar na igwa na siyang pigrecomendar sa junta alagad nagsayumang magngaran sa media mientras na ‘‘recommendatory’’ sana siya na dapat hahalaton ngona na mag-asumir sa puesto an bagong duwang director na marepresentar kan sektor nin edukasyon asin kababaehan.

Si FR nagkapera nang veces kaibanan ni AGM Mongoso kun igwang transaksyon sinda sa Manila. Ini nganing ma-training na siya kan mga dapat gibohon kun iyo na an full fledged general manager.

Siya igwang halangkaw na posisyon sa water district mientras na maabot na sa 40 anyos sa serbisyo sa MNWD na nagpoon sa hababang ranggo.

Aram na kan acting general manager an kabatiran sa trabajo ni ‘‘FR’’ asin calificado pa sa posisyon, sabi pa.

Si Mongoso nagpahayag na mayo nang plano na hagadon sa junta na palawigon an saiyang puesto bilang AGM na matatapos sa Deciembre 31, 2022.

Siya iyo pamayo kan METRO-PESO kan City Hall alagad nagkasundo an lokal na gobierno asin junta directiva na ipasubli ngona si Mongoso nganing iyo an magpadalagan kan water district sa tahaw kan mga controvercia kan dating GM Virgilio Launsing, pagkalugi kan manijamiento asin an pigcucuestion na ‘‘overprice’’ pagbakal nin lote nin daga sa Barangay Balatas asin Mabolo.

Si Launsing asin mga director kan MNWD maging si dating board president George Palma sinangatan nin caso sa Ombudsman. (dpa)