Franquicia kan Evenchance magpapadagos sa CamSur

Apesar kan kahuroton kan apat na lehislador sa opisina sentral kan Philippine Charity Sweeptakes Office (PCSO) na ribayan an Evenchance na operator kan Small Town Lottery (STL) sa Camarines Sur alagad magdadanay an operasyon matapos aprubaran kan ahencia an franquicia.

Si Provincial Branch Manager Jobet Ramos kan PCSO Camarines Sur nagkunfirmar sa Bicol na nagpaisi na sa sainda an Evenchance na nakakua na nin Authority to Operate na aprubado kan main office kan PCSO nganing magpadagos sa Camarines Sur asin iba pang mga provincia na sakop kan saindang franquicia.

Alagad an PCSO Camarines Sur naghahalat nalang kan kopya kan aprubadong franquicia hali sa main office.

Mapaso na an franquicia kan Evenchance sa Febrero 29, 2024 alagad duwang semana pa naka-renew kan saindang franquicia sa laog nin tolong taon.

An mga lehislador na naghuhurot sa PCSO na ribayan an STL operator sa Camarines Sur iyo sinda Congresista LRay Villafuerte kan segundo distrito, Migz Villafuerte kan ika-limang distrito, Tyusoshi Anthony Horibata kan premir distrito asin Bicol Saro party list Brian Raymund Yunsuan huli kan mga pagbalga sa implementing rules and regulations sa nakakasakop na agencia de gobierno sa negosyo.

Alagad sa paliwanag kan operator sa main office kan PCSO nagbiklad man kan saindang evidencia na nagpapahimotik sa mga reclamo.

Enot nang nagpaliwanag si Congresista LRay na dai sinda contra sa STL envez hagad ribayan an operator kan sugal.