Free School, Free Meal

Masiramon, Maogmahon, an buhay nin estudyante kun libre an kakanon sa escuelahan na libre an tuition. An arog kaining sistema, nangyayari sa perang mga public schools sa America asin mayaman na mga nasyones sa kinaban. Duman sa Winnipeg City sa Manitoba Canada, an sakuyang duwang makuapo parehong yaon sa elementarya, dai na kinakaipuhan magluto nin balon sa maghapon na klase ta sa Seven Oakes Elementary School,libre an pangodtohan, libre pa an tuition. Tunay na magayon na pribilehiyo nin mga namamanwaan hale sa tabang kan gobyerno. Satuyang magigiromdoman kan kita yaon pa sa Elementarya, pinapadarahan kita kan satuyang mga magurang nin pan de sal na pig paipitan nin scrambled egg o bagaman tinapay na pan amerikano na pig lahidan nin mairamon na star margarine, dai kabale an tubig ta mayo pa kaidto nin mineral water, imbes, mainom na sana sa gripo sa gilid kan oficina ni Principal. Sa recess, an mga aki sa public school, can afford na magbakal nin burger asin biscuit sa kantina pero dai man malingawan kan mga escuela kaidtong mga inot na dekada na kuntento sinda asin maogma sa balon na sentimos ta nakakabakal nin masiram na linubak sa dahon nin batag lalo na kan nauso an Nutribun hale sa Amerika. Saro sa haloy nang rason kun ta’no ta gulping mga aki an dai nakakadagos sa elementarya, iyan dahil sa pagtios asin mayo nin kakanon sa lamesa antes mag laog sa klase. Kaya magayonon na programa nin gobyerno an magduhol libreng escuela libre pa an pangodtohan sa public school. Sa paagi kan Calle Maduros asin Bicol Mail, ma’wot ko na maisihan kan mga tawo na minsan pa nagka igua nin Free School, Free Meal sa Ciudad Nin Naga. Iyo ini an Naga City Youth Opportunity School ( NACIYOS ) na yaon sa kinamugtakan ngonian kan Post Office sa Miranda Avenue, City Hall Compound. An NACIYOS pig tugdas kan administrasyon kaidto ni Mayor Vicente Sibulo sa pakipag tabangan sa Daughters Of Mary na an Mother Superior iyo si Sister Therese tubong Bulacan. An mga teaching personal gabos voluntaryo hale sa mga escuelahan kan Colegio de Sta. Isabel, Naga Parochial School, Agricultura, asin Ateneo de Naga. An itinutukdo iyo an mga simpleng vocational courses na puedeng maging hanapbuhay kan mga graduado asin an manonongod sa relihiyon asin tamang kaugalian. Saro sa volunteer teacher iyo si Fr. James O’Brian, na iyo an nagtukdo manonongod sa Bicol Culture. Sa kada simana, pig hahatod kami kan service kan City Hall pasiring sa Agricultura sa banwaan nin Pili, tanganing mag adal nin Poultry and Swine Raising. Maogmahon an pagmati kan mga escuela lalo na napaparong na an pig luto na pangodtohan sa kusina kan NACIYOS. Sa mirindalan, nagluluto an mga madre kan Daughters of Mary nin Gina’tan o bagaman Samporado, kaya minapuli an mga estudyante na nag ngingirisi ta nakanood na barasug pa an bituka. Ano daw ta dai na naibabalik an siring na programa an Free School, Free Meal. Puede man ining pag adalan kan Sangguniang Panglungsod na tawan nin libreng pagkakan an mga yaon sa Public Kindergarten and Nursery tanganing lalo pang mapa asenso an edukasyon kan mga Naguenio.