From Hiwacloy With Love

Grabe man si Lolo Awel, garatok na ang bitis dahil sa rayuma, maluya na ang pagdangog dara kan kagurangan ta siya namundag kan asasinaron si US President John F. Kennedy kan 1963. Alagad, nagtuturo pa nanggad ang luha kung nagigiromdoman si Lucy na ngonian saro naman na Senior Citizen asin dai na nanggad nagbabalik sa Partido ta duman na nakapangagom asin nag iistar sa Libertad Pasay. Si Lolo Awel, na ang tunay na pangaran Manuel asin si Mamay Lucy na parehong taga Hiwacloy sa banwaan nin Goa, iyo kaidto an pinag mimirar na Guy and Pip ta sinda ang magka partner sa Santa Cruzan na ang Kapitan iyo si Senyor De Vera. Kan panahon na garong artista sa kasikatan sinda Awel asin Lucy, nabisto ang Baryo kan Hiwacloy na sarong mafreskong lugar ta ini iyo ang pinag aagihan kung ika hale sa centro kan Goa asin mapasiring sa banwaan nin Tinambac. Ang Hiwacloy nabisto sa may masiramon na inumon na tubig na hale sa bukal kan Bukid Isarog, Sagana ang mga gulayon asin frutas sa Hiwacloy ta mataba ang daga digdi asin mahigos an mga tawo sa pag tatanom asin pag ataman nin mga hayop. Arog kan mag elosyon sa mga pelikula ninda Romeo Vasquez asin Amalia Fuentes, asin arog kan mga istorya ninda Romeo and Juliet, siringman ang pagka minootan ninda Awel asin Lucy na sainda pang pig ukit sa poon nin Narra an saindang mga pangaran asin ang hugis nin puso. Kan 1983, nagpa aram si Lucy ki Awel, na siya malarga pasiring sa Manila ta siya an mabantay sa tindahan nin sira sa mercado kan Libertad sa Ciudad nin Pasay. Mayo nin naginibo si Awel Kundi an maghalat sagkod na siya nabubuhay asin inubos an saiyang oras sa pag ataman nin manok asin orig, naging Sagana man an saiyang paroyan asin ang masiramon na klase nin kamote na inaapod sa Hiwacloy na endelible ta ini dekolor asin masapog. Nagrugon ang mga pahina kan kalendaryo sa lanob kan harong ni Awel, dai na nanggad nag tunga sa Hiwacloy si Lucy, kaya palan ta ini napangagom na duman sa Libertad asin duman na nag iistar. Si Awel naka pangagom nin magayon asin mahigos na daraga na taga Maysalay asin nagka igua sinda nin mga aki asin mga makuapo. Dai na nanggad naghali sa Hiwacloy si Lolo Awel ta para saiya ang Hiwacloy iyo an pinaka magayon na lugar sa Partido ta an mga tawo digdi nagkaka sararo asin maboboot. Minsan nag fiesta sa Hiwacloy si Lucy , alagad sindang duwa dara kan igua na sindang kanya kanyang familya dai na nanggad nag atubangan pero nabanaagan pa ni Lolo Awel ang kagayonan ni Manay Lucy. Ngonian na gururang na sinda, nakapag ribayan man sinda nin istorya sa paagi kan mga sadiring tawo na tatao sa social media, asin duman naaraman ni Lolo Awel, na may mga momento daa na nagtuturo an luha ni Manay Lucy kaya palan dai sinda pinalad na magka igua nin Aki. Mayo nang babalikan sa Hiwacloy si Manay Lucy ta mayo na an saiyang mga mugurang asin mayo na sinda nin sadiring solar sa Hiwacloy. Sa pagsulnop nin saldang sa abaga kan Isarog, dai malikayan ni Lolo Awel, ang magpa abot nin mensahe para ki Manay Lucy, asin ini ipinapaagi na sana sa doros asin sa pangitorogan…From Hiwacloy With Love…