Gabos na brgy dapat ‘‘drug cleared’’ sa 2022

An opisina rehiyonal kan Philippine Drug Enforcement Agency (PDEA) sa Bicol padagos an paglibot sa anom na provincia nganing taposon an saindang target na dapat antes matapos an termino ni Presidente Rodrigo Duterte sa Hunyo 30, 2022 gabos na barangay sa rehiyon nadeclara nang malinig na sa gabos na transaksyon sa ilegal na droga.


Si Agent Cotton Uson, opisyal na parataram kan PDEA Bicol nagpahayag na an saindang opisina central sa pamamayo ni Director General Wilkins Villanueva nagpaluwas kan direktiva sa gabos na mga regional director na dapat taposon an problema sa droga sundo sa pagtapos kan termino ni Presidente Duterte.


Sa ngunian igwa pang 1,600 na mga barangay sa Kabikolan an kinakaipuhan pang madeclara na zero sa ilegal na droga, shabu man o marijuana, sabi pa ni Uson.


An patanid ninda sa mga opisyales de barangay asin LGUs dapat masunod an gabos na parametro na an arin man na lugar libredo na sa gabos na ilegal na transaksyon sa ilegal na droga.


Kabale digdi na papasikdan kan barangay asin LGUs, dapat mayo nang personalidad sa droga; ilegal na actividad sa droga; mayong bodega sa droga; mayong drug laboratory, dapat mantenido an organisasyon kan Barangay Anti-Drug Abuse Council (BADAC) asin nagkapera pang dapat masunod.


Kan Febrero 23, 2021, sinabi pa kan PDEA na yaon sinda sa Camarines Sur nganing ideclara an treintang (30) barangay bilang ‘‘drug cleared barangay’’.


Alagad kaipuhan pa nindang ma-monitor para sa validation nganing macierto na mayo nang problema sa ilegal na actividad sa droga, sabi pa ni Uson.


An treintang mga barangay sa Camarines Sur hale sa municipalidades kan Baao, Bato, Nabua, Lagonoy, Ocampo, Del Gallego, Libmanan, Magarao asin Gainza.


An banwaan nin Gainza igwa sanang walong barangay na anas ‘‘drug cleared’’.


Sinabi pa kan PDEA an Camarines Sur saro sa saindang binabantayan mantang iyo an pinakadakulang provincia sa Bicol na kaipuhan higosan kan barangay councils, LGUs asin Municipal Police Stations asin katuwang an iba pang sektor.


An Ciudad nin Naga na igwa sanang 27 barangay alagad mayo pang puedeng ideclara mientras haros na barangay digdi apektado pa sa caso sa mga ilegal na droga.


An zona kan Sagrada Familia, sakop kan brgy. Peñafrancia, Ciudad nin Naga iyo an bantugan na tataghan kan mga dorogista perang decada nang dai mapuho na an mga envuelto sa ilegal na actividad.


An problema sa ilegal na droga perang decada nang dai nareresolber kan mga awtoridad alagad mawot kan PDEA na taposon sa 2022. (dpa)