Gabriela kritiko kontra gobierno, mawot ma-disqualify kan Elcac

Mabawasan nin kritiko an administrasyon Duterte an naheheling na intensyon kan Bikolana Gabriela sa petisyon kan National Task Force to End Local Communist (NTF-ELCAC) nganing huroton na i-disqualify kan Commission on Election an Gabriela Women’s Party sa sahot na nagrerecibi nin fondo hale sa luwas kan nasyon asin sa non-government organization.

Ini an pagtubod kan Bikolana Gabriela na pinamamayohan ni Jen Nagrampa mantang kun hehelingon an record sa congreso dakul na-aprubaran na mga bill asin nasa libredo na bilang acta republica bako lang para sa sektor nin kababaehan envez sa namamanuan Filipino.

World history na an party-list nin kababaehan sa Filipinas lang igwa kaini, sabi pa.

An party-list nagiging kritiko kan gobierno sa mga salang policia alagad an NTF-ELAC mawot ma-disqualify na magtukaw sa congreso.

Si Hermogenes Esperon, dating jefe kan AFP asin vice chairman kan NTF-ELCAC nag-atubang na sa hearing sa petition for disqualification sa Comelec contra sa Gabriela nagpahayag na nagtutubod siya na madi-disqualify an progresibong grupo sa masunod na eleksyon sa Mayo 2022.

An establisimiento militar inaakusaran an Gabriela bilang parte kan Communist Party of the Philippines (CPP) asin kan NPA alagad an party-list pinapahimotikan an alegasyon.

An Gabriela sarong alyansa kan ‘‘grassroots organizations’’ na kabale sa saindang mga advocacia sa mga isyu sosyal siring kan mga deretso humano, poverty, militarism, violence, rape, kultura, salud asin sex trafficking asin iba pang mga pang-aabuso sa kababaehan.

An Gabriela midmid na street parliamentarians kan 1984 kan panahon kan administrasyon ni diktador Ferdinand Marcos. An grupo nang-gana bilang party-list asin ginana an tukawan sa congreso kan eleksyon na ginibo kan 2004 sagcod na parating ganador bilang representante nin kababaehan sa laog na nin anom na eleksyon nasyonal.

Saro pang party-list group na inaakusaran na maka-kumunista na planong ipa-disqualify sa Comelec iyo an Kabataan party-list, grupo nin mga jovenes na pigrerepresentaran ni Rep. Sarah Elago. (dpa)