Gadan na Pulis - Naghugot o Aksidente?

Ni: Paulo DS Papa


CIUDAD NIN NAGA --- Si Police Senior Master Sergeant Tobias Bongon III, parataram kan Naga City Police Office nag-ako na an mga imbestigador dae pa makaugid kan mga ebidensya kun ano an dahilan kan pagkagadan ni Police Corporal Jay Jalapatan.


Maroromdoman na kan Septiembre 19, Sabado, si Jalapatan, 30 taon an edad, taga Milagros, banwaang Carmona, sa Cavite, miembro kan intelligence team kan Cavite Provincial Police Office, nakuang gadan asin mayong pan itaas na bado, naka police athletic shorts na nagpapataw-pataw sa salog Bicol sa may bandang Barangay Mabulo kan Naga. An biktima soboot naghugot huli sa mga kasakitan nin pagbuhay-buhay, sabe kan report kan pulis na pigheras sa midya kan Domingo, Septiembre 18.

AN bangkay kan opisyal na pulis nakuang nagpapataw-pataw sa salog Bicol kan nakaaging Domingo pigbisto kan saiyang pagiriba durante kan imbestigasyon na guinibo kan mga awtoridad na pulis kan Naga sa funeraria sa Barangay Cararayan, Ciudad nin Naga. (NCPO)


Sabe sa report kan pulis, bago kan pagkagadan niya, si Jalapatan bandang alas 11:20 nin aga, Viernes, Septiembre 16, nagbiyahe haling banwaan kan Matnog, Sorsogon kaiba kan saiyang mga katropa na sinda Police Master Sergeant Ru De Asas, Police Master Sergeant Sancho Michael Libunao asin Patrolman JoselitoTorres sa Naga alas 7:20 nin banggui kan sering na petsa asin naghapit sa sarong pribadong harong sa Jardin Real Subdivision, Barangay Concepcion Grande.


Segun ki Bongon, an grupo kan bangguing iyan, nag bakal nin arak asin nagirinuman sa Barangay San Francisco kan Naga. Alagad narisang iba si hiro-hiro ni Jalapatan asin dae nagigiontok, sige an balik-balik sa tulay Colgante hale sa tindahan. Sa bandang huri, si Jalapatan dae na masabotan kan saiyang pagiriba kun napasaen.