Galvez, Duque pinapapili kan madaling mababakal na bakuna

Nagsurat na an City Hall ki vaccine Czar Carlito Galvez Jr asin ki DOH Secretary Francisco Duque III nganing maghagad nin aviso kun arin an madaling mabakal na suplay nin bakuna contra sa Covid-19 sa arin man na pharmaceutical company asin anong brand tanganing makabakal na an ciudad.

Ini an desisyon ni Alcalde Nelson Legacion kan Ciudad nin Naga envez kan liwat naman magpadara nin follow up letter sa duwang opisyal mantang sagcod sa ngunian dai pa pinipirmahan an multi-party agreement nganing makabakal na an ciudad nin sadiring vaccines asin dai sana magparahalat kan patingi-tinging suplay hale sa gobierno nasyonal.


An lokal na gobierno dai puedeng makabakal nin sadiring suplay bakuna sagcod na mayong multi-party agreement sa duwang ahencia dawa igwang sadiring alokasyon an ciudad.


Cantidad P63 milyon an nakatagamang fondo kan ciudad nganing ibakal nin sadiring vaccines sa arin man na pharmaceutical company alagad an nakakaulang iyo an DOH asin Secretary kan Vaccine Czar apesar na pinadara an surat kan City Hall kan Hunyo 24, 2021 sarong bulan na asin sampulong aldaw iginilid sana an pirmahan na dokumentos.


Enot nang nag-order kan Enero 2021 an City Hall nin AstraZeneca alagad an pharmaceutical company nagpahayag na mayo na sindang delivery sa LGUs mantang kulang na an saindang suplay.


Nagbalyo sa Covaxin na gibo sa Bharat, India sagcod nag-order nin cincuenta mil na doses alagad dai pa giraray pinipirmahan an dokumentos.


Huli kaini, tinawan nin opsyon an duwang ahencia nganing iyo na an magpili na madaling mabakal sa kumpanya, sabi pa kan jefe ejecutivo.


An mawot mangyari ni Secretary Duque an ano man na pigsusuplay sa LGU dapat maubos tolos nganing igwang sunod na ipapadara.


Bise Presidente Leni Robredo (sa too) dara an saiyang Vaccine Express nagbibisita sa limang vaccination sites sa Ciudad nin Naga kan Hulyo 23-24, 2021 magkatuwang an Naga Vax Express kan City Hall sa pamamayo ni Alcalde Nelson Legacion (sa wala) nganing makaskasan an barakunahan asin naubos sa laog nin duwang aldaw an 6k doses kan Janssen Vaccines. (dpa)



Naprubaran na kan City Hall sa paagi kan Vaccines Express kan opisina ni Bise Presidente Leni Robredo asin kan Naga Vax Express kaskas si barakunahan sa limang vaccination sites mala ngani sa laog nin duwang aldaw naubos si 6 mil na Janssen Vaccines.


Sinabi pa kan alcalde kun awad-awad an suplay mapaparikas an barakunahan sa 27 barangay marerealisar na kan ciudad an 70 por cientong herd immunity.


An Naga igwa nang maabot na sa veinte mil an nabakunahan o veinte por ciento sa 209,000 populasyon. (DPAureus)