Gamiton Pirmi an Konsensya

Kan sarong aldaw kan nagmamaneho ako pasiring sa supermarket may biglang nag overtake na auto sa wala ko. Kinabig ko pa tu’o si manibela ko asin pag likaw ko pa tu’o nabangga kan si gilid kong salamin (side mirror) si side mirror man kan sarong Mercedes Benz na naka parada.

Nag pundo ako asin nag baba. Nahiling ko na gasgas sana si tama kan salamin ko pero nawasak asin nahulog sa tinampo si tinamaan kong side mirror.

Naka parada si autong nabangga ko asin mayong tawo sa laog. Mayo man na tawo sa sidewalk asin mayong tawong naka hiling kan insidente.

“Haen daw si may sadiri kaini?” An hapot ko sa sadiri ko.

Nag halat ako nin pirang minuto pero kan mayo akong nahiling na may kag-sadiri nag surat ako nin nota sa sarong papel. Sinabi ko sa surat ko na aksidenteng nabangga ko si side mirror kan autong ini asin linaag ko si ngaran asin numero kan telepono ko. Tapos inipit ko ining notang ini sa wiper kan windshield kan auto na nabangga ko.

Pasiguro man na inapudan ko si harani kong amigo na detective kan NYPD asin hinapot ko siya kun tama si ginibo ko. Sabi niya tama daa asin kuanan ko man daa nin mga litrado si danyos kan side mirror nganing prebas na salamin lang si nabangga ko asin litratohon ko daa si rehistrasyon na sticker sa windshield kan auto.

Padagos si pag grocery ko. Pero pagka tapos nin mga tolong oras may nag apod sakuya:

“Are you Manny?” Hapot kan si nag apod.

“My name is Francis and thank you so much for your honesty. I got your note.” Padagos niyang sinabi.

Nag pasalamat tulos ako sa Dios na magalang na marhay si nag apod na may sadiri kan nabangga kong auto.

Nag ulay kami ni Francis. Nag uyon kaming duwa na dae mi na ipapa agi sa insurance na kompaniya ta malanqkaw lang an insurance ko kun gigibohon mi ini.

Pero pina siguro ko nang apudan si insurance ko. Sabi kan si insurance mayo daa sindang problema kun mayong mag reklamo sa banggaan asin ginigibo man daa an arog kaining pag dara sa pag urulay na lang an pag areglo. Dae na daa sinda kalabot digdi sa urulay mi.

Naka hangos akong tultul kan sinabi ni Francis na nag order na lang siya sa “e-bay” nin side mirror sa cantidad lang na $120. Aram ko na mga 400 – 500 ini kun babakalon ini sa kasa kan Mercedes.

Padagos si ulay-ulay mi asin nag desisyon kami na mag hilingan sa opisina niya sa sunod na aldaw nganing tawan ko siya nin $120.

Nag dara man akong sadit na karton na polvoron.

Sunod na aldaw, pag hilingan mi kinugus ako ni Francis asin nag pasalamat otro sa nota ko. Mayo na daang tawo an nag gigibo kan ginibo ko. Naugma pa siya ta Pilipino ako asin may mga ka opisina siyang Pilipino.

Nag Dios Mabalos man ako ki Francis ta saro siyang nobleng tawo. Civil na kaulay.

Inapod niya si boss na Pilipino kan departamento niya nganing ipa bisto ako asin si agom ko na kaibanan ko kan aldaw na idto. Sinabi niya man duman sa mga ibang empleyado kan kompaniya si ginibo ko.

Naugma si boss niya. Orgulyong sabi niya na ‘arog talaga kayan kaming mga Pilipino’. Mga honestong tawo. Sinabi niya ini duman sa tahaw kan mga kaulay ming mga Amerikano.

Na ngalas ako sa mga panyayaring ini. Simpleng menor na nangyari.

Lingaw na ngani ako na nangyari ini. An bu’ot ko lang tabi ipa-aram sa pag surat kong ini, na saro ining ehemplo na an sarong insidenteng bakong marhay na nangyari, magigin marhay ini kun pirmi tang susunudon an marhay na kunsyensa na tinao satuya kan mahal na Dios.

Dios Mabalos po sa pagbasa.

Viva La Virjen!