top of page

Garabang mga school bldg papakarhayon kan DPWH

An opisina rehiyonal kan Department of Public Works and Highways (DPWH) sa Ciudad nin Legazpi igua nang directiva sa 16 na District Engineering Office (DEOs) sa Bicol na ponan na an paghirahay kan mga naraot saka garabang school buildings kan Department of Education (DepEd) mantang nagrarani na an burokasan nin klase sa Hulyo 29, 2024.


Si Regional Director Virgilio Eduarte nagsabi na igua na sindang koordinasyon sa DepEd nganing iimplementar na an rehabilitasyon kan mga raraot na school building kabale na si inagihan nin calamidad.


Sa pinakahuring listahan kan DPWH abot sa 300 na mga school buildings sa anom na provincias kan Kabikolan an dapat mahirahay tanganing magamit kan mga estudiantes sa school year 2024-2025.


Maninigo na an rehabilitasyon kan mga edificio kan escuelahan na nadestroso kan mga nakaaging calamidad sa tahaw kan perming pagkulang-kulang nin mga classroom kan DepEd.


Igua nang total na Php140-milyones na fondo hale sa saindang opisina sentral nganing gamiton sa kaparejong proyecto, sabi pa kan DPWH.


Mientras tanto, igua nang 59 mga evacuation centers an pinatugdok kan DPWH bilang pag-andam sa ano man na calamidad nganing dai na maggamit nin mga classrooms.


Php30-M hasta Php35-M an fundo kan ahencia cada evacuation center mantang duwa cada taon an saindang pinapatindog na pigponan kan mga naagi pang taon alagad sa sunod na taon igua pang apat na bagong matatapos na edificio.

Comments


bottom of page