Garchitorena, CSur nasa red category sa maabot na pirilian

Sarong banwaan sa ika-apat na distrito kan Camarines Sur pigdeclara kan PNP na nasa red category o boot sabihon ‘‘area of grave concern’’ sa maabot na eleksyon nasyonal asin lokal sa Mayo 9, 2022.


An Garchitorena, Camarines Sur iyo an nginaranan kan Commission on Election (Comelec), sa mga pahayag sa media ni Atty. Niel Nicula, Acting Provincial Election Supervisor kan provincia.


Saiyang sinabi an red category banwaan sa Partido district base sa ebalwasyon kan PNP kasunod kan nangyaring ‘‘election related incident’’ sa eleksyon kan 2019.


Tolo gabos na mga banwaan an nasa red category alagad an duwa pang iba dai paman nginaranan kan PNP, 17 banwaan an nasa orange category o markado na bilang ‘‘areas of immediate concern’’.


An PNP asin Philippine Army katabang kan Comelec nganing maaraman an mga lugar na kaipuhan estrictong ma-monitor an paz y orden an lugar sa panahon kan eleksyon sagcod sa aldaw kan pirilian sa Mayo 9.


Alagad mayoria sa mga banwaan nasa election areas of concern o nasa category green na daing problema sa paz y orden.


Sinabi kan Comelec an CamSur igwang 960 polling place na magkakaigwa nin duwang destinong pulis cada polling place nganing magmantenir kan paz y orden.


Sa lado kan 9th Infantry Division kan Philippine Army na may base sa Camp Elias Angeles, San Jose, Pili, Camarines Sur nagseguro na mawarak sinda nin augmentation force sa panahon kan pirilian.


Sa anom na provincia kan Kabikolan, sinabi ni Army Major John Paul Belleza an opisyal na parataram kan 9th ID sa Bicol an Masbate iyo an saindang pinadarahan nin tolong batalyon nin soldados huli ta an provinciang ini perming nasa election hot spot sa panahon nin eleksyon.