top of page

Garo Harani na an Eleksyon



Harani na talaga an eleksyon, sabi ni Mayor Nelson Legacion kan Naga asin ni dating Mayor John Bongat ta bigla sindang nagkaigwa nin kaso sa Ombudsman sa soboot kasalan na pagbalga kan ley kontra korapsyon. “Politics is now in the air” sabi ngani sa tataramon na English.


Sa mga broadcast sa radyo asin telebisyon pati mga bareta sa radyo asin social media panu-pano na nin politika. Digdi sa Naga asin kataraid na banwaan na sakop kan tercer distrito kan CamSur haloy nang kadakul nin pabantulin ni Nonoy Villafuerte Magtuto na soboot sarong negosyante.


An mga poste sa centro kan Naga may mga takod nang birthday greetings asin retrato ni Magtuto, pati an radyo linaog na kan juven na negosyante na primo ni Congressman LRay Villafuerte kan segundo distrito na an titulo: Marhay na buhay ni Kuya Nonoy.


Nagkaigwa nin engrandeng konsyerto an mga parakanta asin artista na paborito kan mga juvenes hali pang Manila. Dinumog nin kadakul na paradalan asin tagahanga an okasyon na an suspetsa dae pa man ngani nagboboroto ta kadaklan mga hayskolano asin hayskolana. May epekto man guiraray sa saindang mga magurang an siring na konsyerto.


Naguiguiromduman ko pati kan dekada 70 kan kasikatan kan mga rockstars na dinadalan nin mga juvenes sa UNC Sports Palace na an mga paradalan naghahali pang Cam Norte asin Iriga City. Iyan an mag-uso an kantang “Laki sa Layaw Jeporoks” ni Mike Hanopol. Remember?


An posibleng sintikan ni Mayor Legacion versus ex- VP Leni Robredo mati na sa 27ng barangay kan Naga. Pwede man na may hararom na suksok an relasyones kan duwa na dae aram kan kadaklan o maski kan mga taga-media.


An mga retrato kan mga Villar asin kan artistang si Bong Revilla lakop sa mga highways asin mayor na tinampo kan Bikol. Nag-gui-greet pati nin happy fiesta o happy cultural festival.


Si vice-governor Sal Fortuno Jr nakatapsok naman ta an saiyang lalawgon nagborotwa naman sa mga pistahan. May mga partylists na nag-aanunciar na kan saindang mga pangaran na mare-eleksyon sa 2025.


Bantog na sa San Fernando na an malaban para alkalde iyo an First Lady ni Mayor Fermin “Perry” Mabulo na graduating na. Sa Milaor an agom ni Mayor Labhas Reyes na taga-Canaman iyo na an pigtutulod kan alkalde na masangli saiya.


Garo kaya uso ngonyan an First Lady na mas poderoso kesa ki mister.


Sa banwaan kan Bato an incumbent suag sa mga Villafuerte.


Sa Pili, si Mayor Bongalonta na dating kontra ki LRay kaya pirming nasususpendir, nagkakampanya na para ki Magtuto ta an ina tugang kan depuntong ama ni LRay.


An mga asul na padyak, bakong e-trike ta sikad-sikad namarangkiwal na sa mga tinampo sa manlaen-laen na banwaan kan CamSur. Dugang sinda sa itom na e-trike na lakop naman sa Camarines Sur.


Sabi ngani mas dakul an padyak kesa mga pasahero sa mga poblaciones kan CamSur.


An mga namamahala kan radio stations asin networks nakamalisya na na an saindang mga prime time broadcasters nagkabarakal na o nasuhulan na kan makakuartang kandidato. Kaya may re-programming na baga.


Sarong taon na lang midterm election na kaya may mga senador na boborotohan, may mga congressmen asin gobernador asin mayor na maburutwa.


Arog kan Calabanga asin Pili may mga bagong mayors an maralataw na. Sa Partido district may mabutwa naman na artista na mahampang sa mga Fuentebella.


Idtong tugang ni depuntong Congressman Rolando Andaya Jr, dating mayor kan Pasig City, pwedeng iyo an mag-atubang sa incumbent congressman kan 1st district na Japanese sounding pero pinsan man sana kan mga Andaya pero kaalyado kan mga Villafuerte. Marhay sa Pasacao ta haros tapos na an eleksyon. An incumbent mayor mabokal, an incumbent bokal ma mayor. Aprub na yan ni Bossing.


Bueno mag- atid- atid- pa kita kan mga mangyayari sa laog kan taon na ini asin sa masunod na taon.


Pwede nang tayaan sa jueteng, sa lotto o sa sweepstakes kun gustong maka-jackpot!

Comentários


bottom of page