Gat Andres Bonifacio monument itutugdok sa Naga, plano tinuturogan

An Ciudad nin Naga sa dai mahahaloy magkakaigwa man nin sadiring munumento si Gat Andres Bonifacio, alagad sarong taon na an resolusyon kan Sangguniang Panlungsod dai pa nakakasumiter an Arts Culture and Tourism Office (ACTO) kan saindang plano asin kun sain na lugar ipapatugdok.

Si Consejal Elmer Baldemoro na iyo an padreno kan resolusyon sa Sangguniang Panlungsod nganing marealisar an proyekto nagsabi si Bonifacio na saro man sa national hero asin ama kan Philippine revolution kun bako dahil saiya baka dai pa kita libredo sa pananakop kan dayuhan na haros parejo man an naging kontribusyon ni Dr. Jose Rizal.


Mas marhay pa si Rizal igwa nang tolong munumento sa Plaza Rizal, Eco Park asin City Hall asin si Jose Maria Panganiban igwa man nakatindog sa laog kan Naga Central School-1 na pigseselebrar cada Febrero, sabi pa ni Baldemoro.


Kan nakaaging Noviembre 30, holiday iyo an ika-153 anibersaryo kan kamundagan alagad huli kan kawaran kan saiyang mumumento mayong nangyayaring selebrasyon sa ciudad.


Sa saiyang proposal dapat itugdok sa bagong development area sa barangay Sta. Cruz na yaon na digdi an City Health Office 2 asin igwa nang bagong edificio nin escuelahan. Alagad hahalaton ninda an isusumiter na plano kan ACTO.


Si Baldemoro nagpahayag na sarong taon na an saiyang aprubado nang resolusyon na tinutukahan si Alec Santos komo pamayo kan ACTO kinakaipuhan maghaman nin plano asin desinyo kan munumento alagad namumundo an consejal dai pa naheheling an plano.

Munumento ni Gat Andres Bonifacio. (deposit photos.com)


Nagkaigwa na siyang privileged speech sa sesyon regular kan SP sa agi-agi ni Bonifacio sagcod inapodan nin atensyon si Santos kun ano na nangyari sa plano.


Pigtalaan na maging bisita sa sesyon regular kan Martes, Deciembre 14 alagad dai makaka-atendir sa dahilan na igwang aatendiran na actividad.


Alagad dai pa digdi mapundo an consejal sagcod na huroton an jefe kan ACTO na magpaliwanag.


Pig-text man kan Bicol Mail si Santos nganing makua an saindang lado alagad mayong reply sagcod inapodan sa telepono dai nagsisimbag.


An consejal nagtutubod na suportado ni Bise Presidente Leni Robredo an saiyang proyekto mantang saludo an VP ki Bonifacio na naging inspirasyon sa pakikipaglaban sa mga dayuhan.


Sa mensaje ni VP Leni sa Bonifacio Day kan Noviembre 30 ‘‘Tumindig si Bonifacio at nagsilbi itong inspirasyon sa pagtindig ng marami pang iba. Nagsisilbi siyang inspirasyon hanggang sa ngayon: Binabalikan natin ang kanyang halimbawa sa tuwing kailangan nating itaya ang lahat sa ngalan ng katarungan at makataong lipunan. Dala ni Bonifacio ang diwa ng laylayang pumapalag sa pang-aabuso ng makapangyarihang interes.’’ (DPAureus)