Gerilya Nin Manok

Kan buhay pa si Lolo Pablo, igua siya nin mga istorya na gikan sa buhay kan mga bikolano durante kan WW2. Sa joven na edad na 13 anyos, nagserbe siyang surogoon kan mga gerilya na nakikipaglaban sa mga soldados na hapones. An saiyang trabaho iyo na mag hatod nin surat hale sa sarong gerilya pasiring sa ibang gerilya. An surat piniripit na papel na nakasuksok sa habayan na garter kan saiyang karsonsilyo. Kaya importante an saiyang trabaho como sorogoon kan mga gerilya ta si Pablo, iguang kabatiran na maka laog sa barracks kan mga hapones asin nahihiling niya ang mga ginigibo kan mga hapon asin nakukua niya ang pinag oorolayan kan mga hapon.

Siya an pinag susugo kan saiyang mga magurang na magkolekta kan sagmaw hale sa barracks kan hapon tanganing iyo ang gamiton na pambahog sa mga ataman nindang orig. Alagad, iguang tugon ki Pablo an mga lideres kan Gerilya, ini mayong iba Kundi dai maki istorya asin dai maki iba sa mga Gerilya Sa Manok. Iyo daa idto an mga peke na gerilya na dai man nakikipag laban sa mga hapones ta ang gibo iyo ang maghabon nin manok sa mga harong kan mga pobreng namamanwaan.

Saro sa naging trabaho kan teen ager na si Pablo iyo na magserbing taga bantay asin taga tundog nin kakanon ki Santos Valencia, na iyo an lider kan gerilya. Si Santos Valencia, sarong maisog na gerilya na matibay sa pagbadil nin calibre .45 alagad siya mismo iguang tama nin bala nin hapon sa saiyang lobot kaya ini nagtatago sa sarong sadit na isla sa tahaw nin uma.

Si Pablo an naghahatod nin pagkakan ki Santos asin sa pagka aldao, si Pablo pig tutukduan ni Santos nin Boksing asin Karate tanganing magdakula siya na sarong tunay na gerero asin maisog na gerilya. May mga bangui, na kaipuhan ilipat nin ibang matataguan si Santos tanganing harayo sa pagmasid kan mga hapones. Si Santos nakalunad sa sarong duyan na nakagakod sa irarom kan damulag tanganing sa paglakaw kan damulag sa tahaw kan uma, mayong mahihiling na tawo na nakalunad sa damulag kaya dai ini nakakalaog sa teleskopyo kan mga hapon.

Ang damulag iguang halabang gakod sa dungo na pig bubutong ni Pablo sa distanciang 100 metros kaya huhunaon kan mga hapon na ang damulag solo sanang nagbabaklay. Kan mag abot an mga amerikano, naasign si Pablo sa pagiging kargador kan mga bag kan mga amerikano ta sa joven na edad, igua nang kusog si Pablo. Kaibahan siya kan mga Amerikano sa pagsakat sa Bukid Isarog. An bayad ki Pablo bakong kwarta Kundi mga de lata nin Karne Norte na saiyang pig dadara sa saindang harong.

Nahihiling ni Pablo an mga gadan na hapon sa gilid kan kanal kan Pacol. Naabot ninda an sarong falls sa itaas kan Isarog na magayon asin mafresko kun kaya ang mga amerikano maogmang nag karigos sa falls na ngonian inaapod na Malabsay Falls. Sa tahaw kan kaorogmahan kan mga amerikano, nag alingawngaw an sarong putok nin badil hale sa kabukiran tumba an sarong amerikano. Pinauranan kan mga amerikano nin bala an palibot kan falls sagkod na nahiling na nakabitay an sarong sniper na hapones.

Sa pagkalihis kan giyera, naging orolay olay ang kabayanihan kan mga gerilya arog ni Santos Valencia na nagka iguang residencia sa M. Castro asin si Pablo nagdakula sa Santa Cruz alagad dai nanggad siya nakaiba sa listahan nin mga gerilya na maistar sa Amerika. An mga Gerilya Sa Manok, dai man nanggad naka duman sa amerika ta bako an hapon an saindang kalaban Kundi an mga manok na pag rugaring nin ibang tawo.