Ghost employees, iba pang isyu pinahimotikan ni Papin

Sinimbag na ni Bise Gobernador Imelda Papin kan Camarines Sur an mga akusasyon kan kampo ni Villafuerte sa social media an isyu sa ghost employees, parating pagpalta sa sesyon regular asin over pricing sa catering services.

Gabos pinahimotikan kan bise gobernador huli ta imposible an ghost employees sa Sanggunian Panlalawigan na siya an namamanyo, perming palta sa kadakle sa sesyon regular mantang an catering services naagi sa mga miembros kan SP asin sa proceso antes nababayadan.


Sa isyu sa mga pagpalta mayong katutuanan an sahot huli ta nag-aatendir siya sa sesyon sa paagi kan virtual mantang ginigibo ngani ini kan mga miembros kan congreso. Si Vokal Romulo Hernandez kan segundo distrito kan Camarines Sur iyo an natukaw na presiding officer mantang an bise gobernador an saiyang presencia sa paagi kan virtual.


Kan dai pa siya na-declara kan candidatura bilang gobernador para sa maabot na eleksyon lokal mayong isyu sa saiya alagad an mga nangyayari ngunian parte na kan politica dai nahahale an mga pakaraot, sabi pa ni Papin.


Normal sa politica an mga akusasyon orog na an saiyang kalaban sa cargong gobernador iyo si Luigi Villafuerte, aki kan congresista kan segundo distrito kan Camarines Sur, LRay Villafuerte.


Si Papin opisyal na candidato kan Partido Federal ng Filipinas ni dating senador Bongbong Marcos, presidential candidate sa maabot na eleksyon.


An bise gobernador dating magkaibanan kan nakaaging eleksyon lokal kan 2019 alagad magkontra partido na ki Gobernandor Migz Villafuerte.


An iba pang mga candidato gobernador iyo si dating 1st district congressman Nonoy Andaya kan Anduyog Party, Ireneo Bongat Jr. na dati nang nagcandidatong sa Sanggunian Panlalawigan kan 2019 asin an negosyante Richard Cabal.