Ginatos na an mga pasajeros kan PNR sa rutang Naga-Ligao

Poon kan Hulyo 31, 2023 nagpoon na an viaje alagad sa mga masunod na semana piglalaom na ginatos nang mga Bicolano aroaldaw an makikinabang na kan baratong flete kan Philippine National Railways (PNR) sa rutang Ciudad nin Naga kan Camarines Sur sundo sa Ciudad nin Ligao, provincia Albay.

Sinabi ni PNR Bicol Spokesperson Greg Mano, tinugotan na kan Operation Department kan manijamiento kan perrokaril sa Manila na ponan na an viaje matapos kan ginibong perang aldaw na dry run asin ‘‘clearing operation’’ kan Engineering Department sa mga linya kan relis hali sa Camarines Sur sundo sa Albay.

Dakulang bagay sa mga devoto ni Nuestra Señora de Peñafrancia sa kapiestahan kaini sa Septiembre 2023 mantang facil na an viaje asin barato pa an flete kumpara sa mga pampasajerong bus.

Poon sa P15 an flete para sa enot na estasyon, saka maabot sa P105 hasta sa huring estasyon.

Duwang viaje ngona kan commuter train an nagdadalagan cada aldaw. Hali sa Ligao Station hastang Naga Station sa alas 5:30 aga para sa enot na viaje. An sunod na viaje cada alas 5:30 nin hapon hali sa Naga pabalik sa Ligao.

Labi sa duwang oras an viaje sa distanciang 67 kilometrong laba kan riles. An mga estasyon kan train poon sa Ciudad nin Naga, Pili, Baao, Iriga, Bato, gabos kan Camarines Sur, Matacon, Polangui, Oas asin Ligao, gabos kan Albay.

Sa ngunian limang pampasajerong kotse an nagdadalagan alagad kun magdugang an pasajeros aroaldaw planong dagdagan an mga kotse.

Kan Abril 2017 kan suspendiron an operasyon kan perrokaril sa rutang Naga-Legazpi huli sa pagkulang-kulang nin rolling stock.

Dai paman sinabi kun nuarin masundo sa Ciudad nin Legazpi an viaje mantang nagpapadagos pa an mga clearing operation pasiring sa sinambit na ruta.

An pagbuelta kan viaje kan perrokaril saro sa mga proyekto ni Presidente Ferdinand Marcos Jr. para sa baratong flete asin kumportableng sasakyan, mantang ini makakatabang para sa mass transportation sa Rehiyon Bicol. (dpa)