Ginhawa Kan Fiesta

Fiesta na ni Ina.

An satuyang Maogmang Lugar nasa centro na naman kan gabos na periodico, telebisyon, radyo, asin mga iba-ibang paagi nin bareta bako sana sa Bicol kundi sa enterong Pilipinas asin sa ibang parte kan kinaban.

Sa ngunian na mga oras siribut nang entero an mga taga Naga. Sa kadaklan satuya, traslacion pa lang may mga bisita na kita. Arog kan nasa Naga pa ako, sarong semana pa lang bago mag sakay si Ina naka destino na kaming mga lalaking aki na iluwas mi na si mga banig sa aparador ta sa salog na kami matururug.

Si mga gurang ming bisita an ma gamit kan mga kama mi ta harale pa sinda sa Manila, Legazpi asin ibang hararayong lugar. Pero orogma kami ta panahon na naman kaming mga mag pirinsan na magka hirilingan. Ika duwa, apwera kan pag pirmi ming pag bale sa prosesyon asin sa parada, mayo kaming iskwela sa mga aldaw na ini.

Pero an gabos na kasibutan may katapusan. Kun ma parong mo na an luto na paksiw sa harong, seniales iyan na tapos na an fiesta. Aram ta gabos na an mga tada kan lechon masiram na paksiwon.

Oras mi na man mag lukot kan samuyang mga banig ta balik na kami sa mga kama mi ta naka harale na si mga bisita.

Samuyang mga aki kaidto, balik sa eskwela. Sa mga magurang balik sa trabaho, sa mga para uma balik sa pag tanum, sa iba, balik sa pag ataman nin orig para sa maabot na naman na fiesta, o oras na mag tipon-tipon na naman.

An tradisyon tang pag selebrar kan kapistahan ni Ina iyo an pinaka dakulang selebrasyon sa Asia sa pag umaw sa Ina ni Hesu Kristo.

Sa laog nin mga duwang semana nagkaka igwa nin sarong dakulang kasiributan – sarong fiesta – sarong banquete. Mga pirang million na tao an na pasiring digdi sa satuyang Maogmang Lugar.

May mga bisita kitang mga pig aapod na mga VIP, mga politico, mga obispo, cardinal, mga padi na hale sa ibang parte kan kinaban, mga dayuhan, asin iba pa. Kan si pag sakay ko ngani sa Pagoda ni Ina kan 2010 na bisto ko si sarong obispo na hale pa daa siya sa harayong nasyon nin Jamaica.

Sa pag poon abot sa katapusan kan mga selebrasyones, dae ta lingawan an mga tawong responsible sa pag asikaso kan mga actibidades na ini. Siring baga kan si mga trabahadores sa mga hotel na dinadagusan kan mga turista, mga janitor, mga waiter sa mga restaurant, mga receptionist, porter, mga taga delivery, security guard, asin iba pa.

Dios mabalos man sa mga tawong nasa likod kan pag bilog kan mga parada asin prosesyon na arog kan mga mahihigos na mga teacher, padi, sacristan, mga pulis, mga istudyante, boy scout, asin mga voluntad na nag tatarabang.

Kabali na siempre diyan si mga tultol na voyadores na nakakapagta-o nin kusog sa fluvial. May mga promesa o panata sinda ki Ina.

Pag mati ko siento porsyentong dae mahahali an pag inom kan mga ibang voyadores ta garo parte na ini kan tradisyon basta dae lang pag pa abuton sa payo an arak.

An tunay na voyador tatao mag inom, dae nabuburat asin nunca nawawara an debosyon ki Ina.

Naiinspirar lang kita kan pag nag inom nin dikit arog baga kan kostumbre kan iba na mag inom nin sarong boteng beer o sarong basong wine pampa gana bago mag kakan.

Mabalos man sa mga trabahadores sa mga mall, sa saod, asin sa mga tindahan. Kabali na siempre si mga magagalang na driver nin mga tricycle asin mga tansportasyon publiko na arog kan mga jeepney.

Sa mga parokya kan simbahan asin sa mga harong na may mga kasibutan, magpa Dios mabalos kita sa mga matitibay tang kusinero asin mga maboboot tang katabang.

Pasensya na po kun may mga nalingawan pa akong mga dedikadong tawong nag papa dakula asin nagpapa ugma kan satuyang fiesta. Aram ko po na ok lang iyan saindo pero bako iyan ok sakuya kaya saindo ko po dedikado ining simpleng artikulong ini.

Para saindo po ini - duman sa mga dae naririparong mga tawong nag tatao satuya nin serbisyo, konswelo, kaugmahan, o maliwanag na saldang sa madiklom na kinaban na ini.

Kamo po an mga honorableng tawo na nag papa engrande asin nag tatao nin tunay na ginhawa sa Fiesta de Nuestra Señora de Peñafrancia.

Dios Mabalos po saindo!

Viva La Virgen!