GIROK TIGSIK - 10

Tigsik ko an tarnerang damulag

An paglakad nagpahiyadhiyad

An ikog sigeng pitik sa piglalangaw na lugad

Nagtutumitomi, naghahanakhanak!

Tigsik ko an pilyohon na loro

Anas sana burahura an gibo

Pangit! Pangit! An rait sa kalbo

Alagad an tuka dumpol, tiko an puro!

An lalong na tumbalikan tigsik ko man

Mayo akong masabi sa ngaran na bulang

Kun sa derby paagang ralaban

Laylay na an butsi, mayong dulagan!

Tigsik ko an gamgam na anggawit

Inabot kan uran, hirit na hirit

An kulot na balukag huminipid

Moymoyon, entirong rupitrupit!

Tigsik ko an halas na rimuranon

Hasta matanga nagparaulmong

Napagimata agang amayon

Bigak an payo, biyong anggoton!

Tigsik ko an buskay sa baybayon

Paborito nanggad kawatan ni Dugong

Pigparaduldog an labot na hararrom

Nagkupsit nin matigsom, ramukat sa lalawgon!