GMs, directors kan ECs pinapa-suspinde

Matapos sipaon sa serbisyo kan Malacañang si NEA Administrator Edgardo Masongsong, hinuhorot na kan consumers group na ipasa-irarum sa preventive suspension asin sangatan nin caso administrativo an general managers asin directors kan mga electric cooperative (ECs) na nagpirma sa cuestionableng board resolutions na nag-aawtorisar kan illegal campaign contributions kan eleksyon kan 2019 sa Philreca asin iba pang party-list organizations.

Sa Camarines Sur an nagkumfirmar na nagsayumang magtao nin campaign contributions iyo an Casureco I sa Libmanan, CamSur asin Casureco III sa Ciudad nin Iriga mantang nagpapahimotik an Casureco II sa Ciudad nin Naga asin Casureco IV sa Tigaon, Camarines Sur mayo pang reaksyon.

Si Pete Ilagan, Presidente kan National Association of Electricity Consumers for Reform (NASECORE) nagpahayag sa Bicol Mail kasunod kan pinadara nindang kahuroton sa NEA Board of Administrators na pinamamayohan ni DOE Secretary Alfonso Cusi epekto sa desisyon kan Office of the President na hinaklas sa puesto si Masongsong.

An kahurotan pirmado kan saindang Executive Director Rafael Antonio Acebedo asin copy furnished si Presidente Rodrigo Duterte asin PACC Chairman Greco Belgica.

Alagad kabale pa sa hinuhorot sa Board of Administrators na mag-isyu nin advisory sa gabos na cooperativa nin electricidad na pundohon an pagpaluwas nin fondo ngani sanang itaong kontribusyon sa Philreca party-list maging iba pang organisasyon pulitika; magconducir nin financial audit sa gabos na ECs nganing maaraman an saindang tinaong kontribusyon sa Philreca asin iba pang cantidad para sa political materials; sangatan nin caso kriminal an mga EC directors asin mga opisyal sa pag-usar kan fondo kan cooperativa na dai aprubado sa AGMA; asin mandohan an ECs na magsuhay na sa PHILRECA, APEC, Ako Padayon asin RECOBODA na rehistrado na bilang mga party-lists.

An PHILRECA o Philippine Rural Electric Cooperative Association, organisasyon kan 121 cooperativa nin electricidad sa nasyon alagad saro nang party-list.

Nagtutubod an consumers group na sa dai mahahaloy ma-aksyon digdi an board of administrators.

Sa desisyon kan Office of the President na pirmado ni Executive Secretary Salvador Medialdea sa casong grave misconduct na sinangat ninda Camarines Sur I Electric Cooperative General Manager Ana Sylvia Alsisto asin CENECO Board President Roy Cordova, base sa dokumento kan caso an mga ECs nagtaong campaign contributions sa Philreca na nagcacantidad nin P500,000 hasta P1.5 milyon sa pagtugot kan tinanggal na NEA administrators. An ECs suboot kaipuhan makataong kontribisyon sa total na P70-milyon bilang campaign funds kan PHILRECA.

Pigbuyagyag pa ni Ilagan na an lambang household consumers nagbabayad nin P1.00 kun sa total na miembros-consumedores sa enterong nasyon kan mga cooperativa nin electricidad na nag-aabot sa 14 milyon, cantidad P14 milyon an binabayad na annual dues sa PHILRECA asin ini dapat pundohon na mantang dai ngani nag-agi sa AGMA. (dpa)