Goa Community College may bagong school site

Ni Sonny Malate

Goa, Camarines Sur --- Magkakaigua na nin bagong school site an Goa Community College (GCC) sa orug na madaling panahon.

Segun ki Dr. Nita V. Morallo, Interim President kan GCC, an bagong campus kan local na colegio namumugtak sa barangay Tagongtong sa banwaan na ini. Ini yaon sa limang hectariang lote na pigdonar kan local na gobyerno sa pamamayo ni Alkalde Marcel S. Pan.

Si Congresista Arnie B. Fuentebella an nagtagama man nin Php100M para sa mga edificio, facilidades asin ibang gastos sa operasyon asin pagmantenir kaini.

An program of work para sa construction kan mga edificio asin kabilogan na facilidades digdi an soboot pig-aasikaso na sa oficina kan Department of Public Works and Highways (DPWH), 4th Engineering District sa banwaan kan Tigaon.

Sa presente, an GCC namumugtak sa dating edificio kan Goa Infirmary, kataid kan Goa Sports Complex, sa centro kan banwa.

An colegio namundag kan Junio, 2022 huli sa pagmakulog ni Alkalde Pan sa kapakanan kan mga Goaeño asin magin mga pagtaraid na lugar. Nagin katabang man an Sangguniang Bayan sa pamamayo ni Bise Alkalde Alfredo P. Gonzaga III asin ibang stakeholders. Ini nasa irarom kan supervision kan Commission on Higher Education (CHED).

An colegio nag-oofrecir nin libreng edukasyon para sa mga taga Goa asin may minimal na babayadan para sa mga residentes kan pagtaraid na banwaan.

Huli sa nagdadakulang populasyon kan GCC asin sa kakulangan nin espasyo para sa pangenot na facilidades arog kan library, auditorium asin school grounds kinakaipuhan na an mahiwas na campus para digdi. An local na gobyerno an nagtataong taonan na Php10M na subsidy sa colegio.

Pigbuyagyag ni Morallo na kan school year 2023- 2024, an populasyon kan escuelahan nasa 675 na enrollees. Ngonian na papalaogon na school year, linalaoman na ini maabot na hasta sa labing 900 na estudiantes gikan sa manlaenlaen na banwaan sa Partido Area.

An GCC may tolong 4 year Board courses asin sa maabot na mga taon hihimohon kan administracion na madagdagan ini tanganing masimbagan an pangangaipo kan mga estudiantes na dae naacomodar kan Partido State University, an pinakadakulang tertiary school sa Partido Area.

Pigtawan doon ni Morallo na sa tabang kan saiyang mahihigos na staff asin suporta kan gobyerno local, maigot nindang pig-aasikaso an mga estrictong requisitos kan CHED tanganing magin madalahay an operasyon kaini..

Mientrastanto, sa kamawotan na orug pang masimbagan an pangangaipo kan mga Goaeño sa lado nin edukasyon, salud, skills training asin programang pangkabuhayan, nakakonsiger man si Alkalde Pan nin Php150M gikan ki Cong. Elizaldy Co asin Jil Bongalon kan Ako Bikol Partylist para sa Multi-Purpose Building for Incentives, Conferences, Education and Sports (MICES).

Dagdag pa digdi iyo an alocasyon na Php170M gikan man giraray sa Ako Bikol Partylist para sa sarong municipal hospital.

Enot pa kaini, pigbukasan na man an Goa Skills Training and Assessment Center sa barangay Tagongtong.

Katakod kaini, si Pan an maogmang nagpahayag na sa pagtatarabangan kan gobyerno asin mga Goaeño, padagos an progreso kan banwaan.

An presenteng edificio kan Goa Community College sa centro kan Goa, Camarines Sur. (Photo GCC)