top of page

Goa  finalist sa 21st Saringaya Awards kan DENR

Ni Sonny Malate


GOA, Camarines Sur --- Gikan sa 24 mga entries sa 21st Saringaya Awards kan Department of Environment and Natural Resources (DENR) kan Rehiyon V, an local na gobyerno kan banwaan na ini nakabale sa apat na top finalist sa prestigiosong contest na ini.


Kairiba sa top finalist afuera sa Goa iyo an probinsiya kan Camarines Sur, Sorsogon asin an ciudad kan Ligao.


An Goa pignominar kan Community Environment and Natural Resources Office (CENRO) na nakabase sa banwaan na ini nin huli sa 1M Trees project, saro sa  mga component project kan premyadong Trekking to Unlock Community Ailments and Difficulties (TUCAD) sa Galing Pook Awards kan nagtalikod na taon.

Sinda Engr. Nikko Luna Picaso kan GEWAMO, Alkalde Marcel S. Pan asin Municipal Administrator Santiago N. Artiaga durante kan awarding kan Saringaya Awards. (LGU Goa)


Segun ki Engr. Nikko Luna Picaso, an pamayo kan Goa Ecological Waste Management Office (GEWAMO), an Saringaya Awards pigtatao kan DENR sa mga individual, agencia,  organization asin compania na may naginobohan na pambihirang proyekto o advocacia dapit sa pagprotehir asin pagmantenir kan karahayan asin kalinigan kan kapalibotan. Sa paagi kaini, ini nakainfluencia asin inspirar sa comunidad sa paggibo kan kaparehong  actividad.


Sinabi ni Picaso na an GEWAMO  iguang dakulang katungdan bako sanang sa pagmanehar kan pagtapok kan basura sa tamang lugar kundi sa kadakol pang mga trabaho katarakod sa kalinigan kan kapalibotan.


An Goa iyo an centro kan progreso sa mainland Partido kaya  nakaatang sa local na gobyerno an hamon kun paano masususteniran an mga advociang piglatag kan liderato ni Alkalde Marcel S. Pan asin kan Sangguniang Bayan sa paagi ni Bise Alkalde Alfredo P. Gonzaga III,  sa lado kan environmental protection.


Pigbuyagyag ni Picaso na an saiyang section na nasa irarom kan Municipal Disaster Risk Reduction Management Office (MDRRMO) sa pamamayo ni Glenn Remedio, iguang 46 na skeletal staff.


An mga empleadong ini dakulang fuerza sa pagsustenir kan mga esfuerzos na piggibo kan local na gobyerno tanganing masusteniran an mga functiones  katakod sa environmental protection. 


An Goa iguang 16 hectarias na waste disposal area sa Barangay San Isidro West, kun saen an sarong hectaria kaini nagagamit na para sa arog kaining katuyohan. 


Mientrastanto, nagpatanid si Picaso sa mga residentes asin mga dayo sa banwaan  kan  Goa na magin marigmat sa mga ley asin policia na pinapautob kan local na gobyerno digdi mapadapit sa kalinigan kan kapalibotan.


Particular na pigbanggit kan pamayo kan GEWAMO an mapadapit sa pagyupyop nin vape, pagpaarutoot asin pagpabakal nin sigarilyo. Ini katakod sa Municipal Ordinance No. 273, o an Anti-Smoking Ordinance na higot na pig-iimplementar sa presente.


Segun ki Picaso dakul nang mga nagbalga kan ordinansa an naaprehendir asin napenaran orug na an mga dayo sa banwaan na ini.


Naoogma man an inhinyero na sa suporta asin paglapigot kan premyadong alkalde Pan asin Sangguniang Bayan, naaprobaran na an diez años na Solid Waste Management Plan kan Goa sa Solid Waste Management Commission kan Enero, ngonian na taon.


Afuera sa banwaan kan Goa, aprobado na man an kaparebong policia kan Caramoan asin Siruma.


An Solid Waste Management Plan iyo an nagseserbing giya kan local na gobyerno sa magmanehar, mantenir asin sustenir kan mga significanteng policia dapit sa pagprotehir,  preservar asin conservar kan kalinigan kan kapalibotan.

Comments


bottom of page