top of page

Goa marokyaw kan ika-217ng foundation anniversary

GOA, CAMARINES SUR --- Macelebrar kan ika- 217ng taon kan pagkatugdas bilang sarong  banwaan an Goa sa Abril 18 hasta 24, 2024. An celebrasyon may temang “Kulturang Goaeño: Padabaon asin Ipag-orgulyo.”


Katakod kaini, dakol na mga makolor asin makahulogan na actividades an ilalatag kan gobyerno local sa pamamayo ni Alkalde Marcel S. Pan. Mayormenteng natukahan na magmanehar kaini iyo an Municipal Tourism Office sa pangengenot ni Sheila Belleza - Visitacion asin Cultural Arts Council.


Katabang pa man iyo an  Sangguniang Bayan sa pamamayo ni Bise Alkalde Alfredo P. Gonzaga III, mga oficiales kan barangay, asin suportado kan iba-ibang sector kan comunidad.


An celebrasyon may katoyohan na itampok an suanoy na mga gawi-gawi, kalingaan asin iba pang aspeto kan sociodad na naglaladawan kan mayaman na kultura kan mga Goaeño. 


Sa paagi kan pagbuhay liwat kaini,  ini an minataong inspirasyon sa comunidad sa tahaw kan modernong panahon.


Siring man, ini an minahawan kan  dalan tanganing maglataw an kagayonan, abilidad asin pambihirang talento kan mga Goaeño sa linya nin Arte, Literatura asin ibang kakayahan.


Man-iba-ibang mga actividades an itatampok sa sarong semanang gayong celebrasyon. Nagkakapira kaini iyo an karera nin karabaw, haragotan nin abaca, buradol contest asin tigsik saka rawit-dawit competition.


Dagdag pa digdi iyo an Primerong Sagwan sa Barsa, palo sebo, saltarin, short film making competition, uroistorya vlogging competition asin dakol pang iba.


Yaon man an Orgulyo Konserto na babalehan kan mga local na musikero, tampok an Tothapi bilang guest performer. Dae man mawawara an pagpili kan Binibining Orgulyo 2024 na pighahalat kan mga taga Partido Area.


An finale event iyo an Praise Awards  bilang pagrecunosir kan pambihirang  naginibohan sa puwesto asin katungdan kan mga oficiales asin empleados kan gobyerno local.


Mientras na nasa ika 217ng taon  na an banwaan kan Goa, sustenido kaini an pagigin centro kan progreso sa Partido Area. Katakod kaini, kadakol na mga residentes digdi an nag-aapreciar sa calidad ni Alkalde Pan bilang sarong actibo, efectibo asin hands-on na Servidor kan banwa.


Huli kaini, si Pan asin an local na gobyerno kan Goa padagos na nakakaguno nin mga awards sa lado nin local good governance, best practices sa pag-extender nin pangenot na mga serbisyo sa comunidad, revenue generation, edukasyon, asin iba-iba pang aspeto sa paggogovernar.


Nagtutubod an kadaklan na  huli kaini asin sa iba pang mga contribuenting basehan,  dakulaon an potential kan Goa na magin primerong ciudad sa bilog na Partido Area.


Sagwan sa Barsa saro sa mga tampok na actividad sa Orgulyo Festival kan Goa, Camarines Sur. (Photo: LGU Goa)


Opmerkingen


bottom of page