Goa MPS sustenido an feeding program, iba pang best practices

Ni Sonny Malate

Apwera sa regular na trabaho katakod sa pagmantenir  kan paz y orden sa localidad,  sustenido man kan Goa Municipal Police Station (MPS) an saindang best practices orug na sa lado nin community engagement.

Saro digdi iyo an feeding program para sa mga kaakian sa mga barangay asin escuelahan na ginigibo kada bulan. Ini an apreciado asin ikinakaogma kan mga kaakian, magurang asin mga paratukdo.

Segun ki PMaj Ronald P. Brugada, hefe kan Goa MPS, sa suporta kan saindang mga stakeholders,  regular nindang nagigibo an feeding program. An fundo  para sa masustanciang  soft meals  gikan mismo sa saindang oficina asin donasyon kan mga individual na bukas an puso sa pagtabang.

Apwera sa mga personahes kan hepatura, katuwang  ninda an mga Police Intern na estudiantes sa cursong Criminology sa sarong local na colegio,  oficiales de barangay asin mga volunteers sa pagconducir kan feeding program. 

Namamate ni Brugada na nakakapataba sa puso na mahiling na nakakatuwang an saindang oficina dawa puropapano sa supplemental feeding program para sa kaakian, orug na itong gikan sa tikapong pamilya.

Mientrastanto, kada taunan na celebrasyon kan Aldaw kan mga Puso, nasa kalye an mga personahes kan Goa MPS para sa nakakainspirar na proyectong "Helmet Mo, Buhay Mo."

An eksena sa kalye orug pang nagiging makahulogan mantang an pagduhol nin libreng full face helmet sa recipiente may kaibang burak na simbolo kan espiritu kan pagkamoot sa Valentine's Day.

Susog sa hefe, an calificadong recipientes kan libreng helmet dapat may driver's license, rehistrado an motorsiklo asin daeng capacidad  magbakal nin tamang klaseng helmet na pangmotor en vez  gamit sana an construction safety hat.

Katakod sa road safety, nagpagiromdom si Brugada sa mga motorista na manteniron an disiplina sa gabos na oras sa tinampo tanganing malikayan an  aksidente.

An fundo para sa proyectong libreng helmet kairiba sa Peace and Order and Public Safety (POPS) Plan kan local government unit (LGU) kan Goa, sa liderato ni Alkaldesa Raquel S. Lim,  na bilog an  suporta sa Goa MPS.

Saro pa man na best practice kan hefatura kan Goa MPS iyo an pagdesignar nin sarong pulis sa kada barangay sa 34ng barangay digdi. Objeto  kan  proyecto na magkaigua nin focal o contact police personnel an barangay pasirling sa local police station gamit an cellphone.

Sa paagi kaini, mas madali, efectivo asin sistematico an comunikasyon kan residentes sa  designadong pulis sa sainda na iyo an tulay para  masimbagan an pangangaipo dapit sa paz y orden asin ibang lado sa comunidad. 

Pigbanggit kan hefe de policia na sa presente an Goa declarado nang drug free, drug cleared municipality. Sa padagos na pagtatarabangan kan gobyerno asin residentes, siya naglalaom na an katrangkilohan sa localidad orug pang madanay.