GOB MIGZ NAGPALUWAS REAKSYON: Andaya nakasalbar sa panghihipa

Tolong aldaw matapos bawian nin police escort si dating 1st district Congressman Rolando Andaya Jr. hinipaan kan dai pa mamidbid na armadong suspechado alagad nakasalbar an dating lehislador mantang bullet proof an saindang piglulunadan na land cruiser mga alas 7:30 nin aga, kan Martes Hunyo 1 sa barangay Palestina, Pili, Camarines Sur.

Sa mga pahayag ni Andaya sa miembros kan media pasiring siya asin mga kaibanan kaini sa barangay Cadlan, Pili, Camarines Sur nganing aramon an reclamo nin mga paraoma na pigdampingan nin daga an saindang kaomahan mientras na duwang semana na nakatalaan nang aanihon an paroy.


An vehiculo ni Andaya segun sa imbestigasyon kan Pili Police Station may tama nin duwang bala kan calibre 45 badil.


Katuyohan kan gobierno provincial na tambakan nin mga daga an kaomahan huli ta gagamiton para sa pig-coconstruhir na Iconic Capitol.


Namumundo si Andaya sa nangyari sa mga biktimang mga paraoma sa tahaw kan pandemya apektado an saindang hanap buhay sa agricultura alagad mantang nagtataram siya sa ginigibong protest rally kan mga paraoma contra sa Capitolyo Provincial nagkaigwa nin tensyon an grupo asin kan pigtutubodan na personajes kan govierno provincial.


Nakalma tolos an tensyon kan sawayon kan kapupulisan kan Municipal Police Station asin kan PNP Provincial Office kan Camarines Sur.

Vehiculo ni dating Congresista Nonoy Andaya hinipaan sa Palestina, Pili, Camarines Sur. (Gelo Abugao)


Nagpasalamat si Andaya na an saindang dinarang service na vehiculo bullet proof sagcod na mayong nairedo sa sainda.


Si Col. Bernard Perez, Provincial Director kan Police Provincial Office Camarines Sur nagsugo na sa MPS na magconducir nin imbestigasyon sa pagprubar sa buhay kan dating congresista.


Kinundenar kan dating congresista asin kan mga nagpoprotestang paraoma an ginibo kan Capitolyo Provincial na dai nalang hinalat na makaani kan paroy nganing makinabang an mga paraoma sa saindang ginastosan alagad dai na makakabawi.


Maabot sa 200 na paraoma an apektado kan proyekto. Nagprobar na magrani sa pigcoconstruhir na proyekto alagad tinapaan na kan mga heavy equipment kan grupo kan civil security unit kan provincia.


Si Gobernador Migz Villafuerte mayo pang reaksyon sa reclamo kan mga paraoma.


Si Col. Bernardo Perez, Provincial Director kan PPO nagsugo na sa MPS Pili na magconducir nin imbestigasyon sa nangyaring pagprubar sa buhay kan dating lehislador.


GOB MIGZ NAGLINAW KAN ISYU

Nagpaluwas na kan saiyang paglinaw si Gobernador Migz Villafuerte sa paagi kan FB Post sa isyu kan propriedad kan mga paraoma, sinabi kaini ‘‘nais ko lang pong ipaalaman sa lahat na ang gobyerno probinsyal ay maayos na nakipag-usap at nagbayad sa mga nagmamay-ari ng lupa at maayos na nakikipag-usap sa mga tenant sa magsasaka. Compensated po ang land owners. Ang mga naninirahan at nagsasaka dito, kahit hindi sa kanila nakapangalan ang lupa, ay irerelocate din at bibigyan ng malilipatang bahay at ayuda.


Malinaw na ang probinsya ang may-ari ng lupa na tatayuan ng proyektong ito basado sa writ of possession mula sa korte. Dumaan tayo sa tamang proceso.


Hindi po nababaliktad ang writ of possession sa panggugulo at paghahamon ng suntukan. Kun may gustong magreklamo, padaanin sa tamang legal remedies at hindi sa pananakit at pananakot’’.