Gobyerno pursigido sa implementasyon kan Oplan Paalala - Iwas Paputok

Ni Sonny Malate

Sa pag-abot  kan kaogmahan sa celebrasyon kan   Kapaskohan asin Bagong Taon, higot an campanya kan gobyerno dapit sa Oplan Paalala -  Iwas Paputok sa bilog na nacion. 

Ini sa paagi kan Bureau of Fire Protection (BFP) asin Department of Health na iyo an mga lead agency kaini,  sa tabang kan local government (LGU), PNP, force multiplier  asin stakeholders. 

Sa Partido Area, an BFP sa mga banwaan digdi an naggibo nin anuncio publico,  gamit an saindang fire truck dapit sa paglikay sa kasulo na an sarong  causa iyo  an  aliwalas na paggamit nin mga pyrotechnics o paputok. Dagdag pa iyo an pagmonitor kan pagtinda kan mga peligrosong paputok.

Manonotaran na taun-taon,  nin  huli sa mga paputok  piming may mga individual na kun bakong nagkakaiguang danyos sa hawak,  sinda an binabawian nin buhay. Siring man, may mga nangyayaring kasulo resulta man kan kaparehong causa. 

Katakod kaini, sa Goa, Camarines Sur, centro kan comercio sa Partido Area,  magpoon kan Deciembre 19 hasta 31,  liwat na nagtaltag nin puwesto nin pyrotechnics an nagkakapirang mga negociante kaini.  Ini nakalatag sa atubangan na parte kan Goa Integrated Central Terminal (GICT).

An puwesto harani sa Culasi River na bastante an tubig in caso may magbungkaras na kasulo. An puwesto an pigbibibibisita kan personajes kan Goa MPS sa pamamayo ni PMaj Ronald P. Brugada. Siring man kan BFP Goa sa irarom ni Fire Marshall Henry L. Boncodin.

Sa lado kan LGU sa liderato ni Alkaldesa Raquel S. Lim, ini an higot na  pigmonitor kan Economic Enterprise Office tanganing maasegurar an katrangkilohan asin seguridad sa puwesto kan mga paputok. 

An cada ocupante digdi pigtasaran nin Sangribong (Php1,000.) Pisos Business Permit kan LGU Goa asin labing Tres Cientos (Php300.) Pisos na Mayor's Permit. Ini apwera pa kan pigbayadan ninda sa barangay.

Segun sa saro sa mga paratinda, an mabenta sa sainda iyo an rebentador, kwitis asin Judas Belt. Ini an pig-order o pigbakal ninda directa sa Bulacan, an midbid na gibohan nin pyrotechnics na iba-iba an klase asin precio. 

Dagdag pa niya, an saindang paninda pigkakarkulo ninda na mapaubos  hasta sa Deciembre 31, mantang dae puwedeng ibalik sa supplier an dae nabenta. Dae man puwedeng sarayon sa harong o bodega huli ta peligroso. 

Segun pa sa sarong negociante, an dae nabentang paninda pinapaputok na sana ninda orug na kun sinda nakadilencia na. An iba man igua pang ibang puwesto sa kataraid na banwa tanganing marikas an bentahan. 

Dawa na ngani an nacion inagihan nin mga calamidad, an mga negociante nin pyrotechnics an naglalaom na dakula an bentahan kaini orug na sa Deciembre 31 sa pagsabat kan Bagong Taon.

An pagpapaputok nin iba-ibang pyrotechnics, pagcrear nin tanog kan torotot, takop kan caserola, rangkada kan motor asin iba pang ribok parte na kan cultura kan mga namamanwaan sa pagsabat kan Bagong Taon. 

Dakol an nagtutubod na soboot  ini pampadulag sa  mga maraot na espiritu. Ini duminokot na sa isip kan kadaklan kaya sa paglaog kan Bagong Taon bako sanang tanog kan rebentador an nadadangog kundi pati takop kan caserola, busina kan vehiculo, rangkada kan motor asin putok kan badil.

Panindang mga paputok sa GICT sa Goa, Camarines Sur (Photo - BM)