Gonzaga bagong alkalde kan Goa

Ni Sonny Malate

GOA, Camarines Sur--- Igua na nin bagong alkalde an banwaan na ini, kasalida sa defuntong local chief executive, Marcel S. Pan na binawian nin buhay kan Septiembre 14,  huli sa helang na kun pirang taon na namatean niya.

Si Bise Alkalde Alfredo P. Gonzaga III an nagsumpa na bilang bagong alkalde base sa law of succession. An puwesto man na binayaan ni Gonzaga yaon na ki topnotcher kagawad Antolin P. Respall.

An bagong alkalde na may maogmahon na personalidad an bistado sa apod na “Pay Pedong”. Siya saro sa mga joven na nagin alkalde kan banwa.

Sinda Gonzaga asin Respall an sabay na nagsumpa sa saindang puwesto kan Septiembre 16,  2024 ki Barangay Captain Antonio Palaypayon kan barangay Belen, banwaan nin Goa.

Durante sa regular flag raising ceremony kan Lunes, Septiembre 16, pig-anuncio ni Alkalde Gonzaga na saiyang ipapadagos an mga marhay na programa, proyektos asin advocacia ni Pan na padagos na napapakinabangan kan comunidad.

An Goa sarong first class municipality asin pigmimidbid na centro kan edukasyon, cultura asin actividades na pang-economia asin  progreso sa Partido Area. Dakol na mga residentes an nagrerecunosir sa dakulang ambag kan defuntong alkalde sa kauswagan kan banwaan na ini.

Si Pan an sarong multi-awarded na local chief executive huli sa mga pambihirang programa na saiyang pig-implementar sa suporta kan Sangguniang Bayan, department heads, oficiales de barangay, iba-ibang sector asin stakeholders.

Saro sa mayor na programa kan alkalde na nakaguno nin Galing Pook Award iyo an Trekking to Unlock  Community Ailments and Difficulties (TUCAD). An programang ini an nagpapaharani kan servicios kan gobyerno sa mga tios na residentes sa mga may distanciang  barangay sa centro kan banwa.

Apwera sa pagigin ama kan banwa, si Pan an nagserbi man bilang board member kan junta provincial para sa distrito kan Partido. Siya pigmimirar na sarong pusog na harigi sa lado kan marhay na paggogovernar. Siring man, siya inspirasyon kan mga servidor sa gobyerno orug na an mga jovenes.

Mientrastanto, an pag-asumer ninda Gonzaga asin Respall sa saindang puwesto an pigsabat man nin positivong pananaw kan mga namamanwaan sa banwaan kan Goa.

Nagpoon sa dating Kabataang Barangay, si Gonzaga an natais sa pagigin sarong efectibong lider na may bastanteng calificasyon sa puwesto na nabayaan kan sarong multi-awarded na alkalde kan pinakaprogresibong banwa sa Partido.

An bagong bise alkalde, Antolin P. Respall, sarong dentista asin retirado sa gobyerno. Sinda Gonzaga asin Respall asin bilog na Sangguniang Bayan an iguang marhay na team work. Ini an piglalaoman na dakulang ventaje sa pagbusol sa orug pang pag-uswag kan banwaan na Goa.