Good bye, Ama

Isay si Ama? Siya si Eldefonso “Jojo” Amador, Ateneo University High School 76. Dakul an apod saiya. Enot Otoy, an apod saiya kan pamilya palibhasa kangudan saka kan mga kakawat niya sa Milaor sa kawat na basketball ta siya an may saderi kan bola. Sa tahaw kan karawat kun biglang magpuli si Otoy pundo an basketball. Na Otoy sinda.

Sa radyo pig-apod siyang Jojo ta mahilig siya sa jazz-jazz music. Sa DWLV kan dekada 80 siya lang an nagpapatugtog nin jazz music sa Naga. Jazz-Jazz means Jojo.

An iba niyang amigo an apod saiya Ildy. Si Gina an saiyang agom kan sinda mag-sweetheart palang an apod saiya Ponse o Ponsing.

Pero pinakabantog siya bilang Ama ta iyan an shortcut kan apelyido niyang Amador. Kun an saiyang bestfriend sa Naga Parochial School asin sa Ateneo na si Ruel Gonzaga na pig-aapod Aga, si Jojo Amador pig-aapod Ama.

Siya pati an ama-ama asin harigui kan Ateneo de Naga High School 76 bako lang sa Naga, sa Manila kundi sa abroad. Organizer siya kan dakul na aktibidades kan batch poon kan graduation kan 1976.

Sa broadcast si Jojo nag-apply sa DWLV AM station bilang DJ nin jazz music pero nin huli ta dikit an paradangog kan siring na musika pig-encaminar siya na maguin miyembro kan DWLV news department bilang reporter asin newswriter na harayo sa saiyang hilig asin pinag-adalan.

Bilang mestizo asin gwapo dakul siyang tagahanga sa primerong 10k radio station sa Bikol. Bilang primerong production manager kan LV kan 1981 kinupkop ko si Jojo ta mahigos asin marhay na potential.

An dai aram kan kadaklan si Jojo an enot pa sa Eat Bulaga na nagka-igwa nin programming an radio on-the road. Ako an mobile program host na nagpo-programa sa luwas, siya an walat sa studio bilang spinner nin mga advertisement.

Si Manny Natividad an piloto sa awto ala vis technician. Sa estasyon walat si chief Entong Madrigal asin Joe Landong. Sarong beses nag-programa kami sa St. Bridgette sa Buhi kun sain nagka-igwa nin instant amateur singing contest. Panu-pano si campus, nakalinya pa si mga para-antabay sa kalabaan kan tinampo haling Naga abot Rinconada yda buelta.

Saro pang naguinibuhan ni Jojo bilang broadcaster iyo an maguin driver siya kan grupo ni LRV kan mag-orolay sa grupo ni depuntong Senador Edmundo B. Cea. Pagmukna kan UNIDO sa Camarines Sur en-preparasyon kan famusong Apat na Aguila.

Haling DWLV kami ni Jojo an iriba sa saiyang yellow vokswagon palibhasa dai pa ako tataong magdrive nin awto kasunod mi an berlina sakay si dating Trade Minister Luir R. Villafuerte saka an saiyang matuang hermano na si Titoy Villafuerte pasiring Nordia sa Canaman.

Naghahalat samo duman si Senador Cea saka si Sal Fortuno, station manager kan DZGE.

Pag-abot mi sa Nordia eksaktong alas 10:00 nin bangui pinalsok si ilaw asin duman sinda nag-orolay.

Minukna an UNIDO sa Cam Sur asin ipinangidam an Apat na Aguila. An accreditation kan UNIDO bilang dominant opposisyon sa Cam Sur sa eleksyon kan 1984 linakaw mi pa ni Jojo sa Comelec kaiba mi pa si ex-city councilor Leo Aguilar kan Taguig.

The rest is history.

Si Jojo maski yaon sa Pilipinas nagparabasa na nin diyaryo nasyonal asin mga libro dapit sa politika asin journalism.

Pagpa-America niya kan 1985 nagpadagos siya kan pagbasa kan mga diyaryong New York Times, Los Angeles Time asin Washington Post kaya naintindihan niya an daralagan kan politika asin media maski duman sa America.

Bago si Jojo naglarga an paaram niya sa pag-iriba mabuelta lang siya sa Pinas kun makatipon nin dikit ta siya Pilipino asin dai nungka maguiguin American citizen.

Siya an nagbuyagyag na sagkod ngunyan igwa pa nin discriminasyon duman sa Estados Unidos ta maski ngani siya maputi ta mestizong Kastila pigmimenos sinda kan mga itom huli sa accent.

Duman sa East Coast duman sa America kun sain sinda naka-estar sa Jersey City, nagdagos kami ni NBI Director Rick Diaz, future Iriga City Mayor Rex Oliva asin an saindong alang-alang nagdagos sa saindang dakula asin magayon na residencia.

Nag-ngalas ako kan 2016 kan magpuli sinda ni Gina asin ma-interview ko sa programang Ini An Totoo sa GNN TV48 ta sinda mag-agom pareho pro Duterte ta nagtutubod daa sinda sa systemang Federalismo.

Si Jojo may paninindugan. Kan naka-aguing eleksyon para ki General Oma Buenafe siya para consehal kan Naga, Atty. Anselmo Cadiz para congressman sa 3rd district kan Cam Sur,para ki Nelson Legacion para alkalde kan Naga.

Padangaton niya si Usec-Judge Clavo, law classmate ni P.Digong sa San Veda.

Gana o daog laban siya.

Bilang saro sa pinaka-padangat kong aijado si Ambrose Rajs (FB account name), nag-greet pa sakuya nin advance happy Birthday kan Nobyembre 5 asin naghagad dispensa ta dai siya makaka-abot. Sabi ko OK lang ta mayo man ako nin puesto.

Rain or shine yaon pirme si Jojo. (Binawian nin buhay si Jojo sa pagkaturog sa saiyang kuarto kan Nobyembre 10, 2022, alas 4:00 nin hapon an lubong Nobyembre 20, 2022 sa Peήafrancia Shrine Cemetery).