Goodbye Karambola

Sarong bulan na an naka-agui kan ako nagdadangog na sag abos na estasyon nin radyo digdi asin sa Manila ta dae na ako kuntento na magdangog sana sa sarong paboritong estasyon nin radyo.

Tano ano an nangyari?

Ako mismo nagngalas ta luhay-luhay nawara an sakong amor na magdangog sa dati kong paboritong programa na “karambola” sa Aliw Broadcasting o Home Radio.

Namalisyahan ko kaya na garo bako nang objective o balansyiado o parehas an nasambit na programa asin network.

Garo igwa nang kinakampihan--- an gobyerno nasyonal na sana o an Camara de Representantes ni Ferdinand Martin Romualdez.

An lado kan kalaban arog ki dating Presidente Rodrigo Duterte asin Pastor Apolo Quiboloy kan SMNI ipinapa-irarom sa bareta o winawara ta an prominente sana an lado kan gobyerno PBBM.

Nakontrol an mainstream media, diyaryo nasyonal, radyo and TV networks. Palibhasa poderoso an nagluluwas sa mga bareta iyo an kakampi kan gobyerno asin naturalmente an ipinagbabalangibog sa enterong nasyon asin ipigtatranslate o lipat tataramon iyo an paborableng version kan saindang bareta arog kan “P.I. nila”, aro-aldaw na hiro kan presyo kan gabos na produkto arog kan petrolyo, produkto agrikultural arog kan bagas, gulayon, siring kan sibulyas asin iba pa na lalong nagkakariribong an mga tao ta natatahuban an mga isyu na dapat tahuban asin pinapalayog an saindang propaganda na pabor sa saindang intereses komersyal asin politikal.

An mga bareta pati puro sana may koneksyon sa gobyerno asin sa mga kalaban kan gobyerno. Enot na nakapadisganar sako iyo idtong pigsasabing Unity Team na ngunyan buru-ag na. Naheherak ako ngonyan sa mga walahon arog ki Senadora Risa Honteveros asin Congresswoman France Castro ta dae na aram kun saen mataya sa eleksyon norong taon saka sa presidential election 2028.

Maski an NPA ribong na an balanak ta mayo na pati si Jose Maria Sison.

Pano kun magka-baranga an Pilipinas asin an nasyon maguin LuzVi na sana ta mawawara na an Minda? Pano na an politika kun mayo na nin kuarta o ayuda?

Pano na an pig-aapod na Independent foreign policy?

Mayo na daa kitang base militar ta an America sa Pilipinas poon pa kan 1990 alagad ngonyan kadakul na lugod kan pig-aapod na EDCA na medyo saradit na base militar ni Uncle Sam sa kadagaan ni Juan dela Cruz?

Sa isyu kan pig-aapod na West Philippine Sea o South China Sea puro na sana propaganda kan America an nababasa asin nadadangog niato pero mayo nungka hali sa ibong na lado maski hali sa nguso kan fuerza armada.

An pigtatakot ko iyo na mangyari si nangyari sa Vietnam kaidto kan dekada 60-70 na permi sanang gana sa batalya an America katapos-taposi daog palan. Nagdurulag baga si mga Kano.

Mala sa Ukraine versus Russia sa Europa ta mayo ka bagang madangog na tultol na bareta hali si Lewenski o hali ki Putin.

An mga Pilipino dae na basta-basta napapatubod sa mga propaganda, balubagui asin intrigas kan mass media, mainstream o social media.

Kulibat ko palan haen na si Atty. Trexy Cruz Angeles?

Kun sabagay kun aldaw na Sabado yaon na an programa ni Kuya Nonoy Magtuto.