Goodbye my friends, my media friends



Nagkakapirang miyembros kan lokal na midya digdi sa Naga asin Camarines Sur(print, broadcast asin social media) an nagtaralikod sa kinaban sa kasagsagan kan pandemya na dara kan Covid 19 huli sa manlaen-laen na kamatean.


Enot amay ngonyan na taon, pagbukas kan bulan na Enero nagkabirigla an gabos, amigos/amigas pati kapamilya duman sa Amerika sa bareta na tinamaan Covid 19 si Wasoy Florin, kan DZLW, dating announcer sa DWNW asin Farm Radio Naga, an pig-cremate tulos-tulos kaya dai na naheling kan saiyang ka-amistades asin tagahanga. Nakiulay man pati an pamilya na kun pwede dai man ibalangibog tulos an mamundong bareta. Dating konsehal kan banwaan na Minalabac, siya may mahiwason na dagang pig-ooma sa balyong salog kan Minalabac.


Pakalihis nin sarong semana kan saiyang kompleanyo kan Enero 15 binawian man nin buhay huli sa natural na kamatean si Emil Saavedra, 75, alyas Doyong sa kapamilya, Emil sa taga-media asin Atlas sa kabarkada.


Dating campus journalist sa UNC komo editor-in-chief kan Nueva Caceres publication antes kan Martial Law, embes na magtukdo ta graduado siyang BS Education, naguin full-fledged journalist tolos: cub reporter kan Bicol Mail, editor-in-chief kan Bicol Chronicle sa Iriga, columnist kan manlaen-laen na dyaryo sa Naga kabali na an Bicol Mail, naguin TV producer kan GMA 7 Naga, nagsurat nin sarong libro tungkol sa dinastiya, nagibo nin sarong pelikula tungkol sa estorya ni Inang Nuestra Senyora de Penafrancia, nagplano kan saiyang personal na “Blue Revolution” kontra sa presenteng sistema asin administrasyon, self-proclaimed chairman kan Kantong Putikon group sa SM bago siya nagadan. Naguin man siyang politiko komo OIC vice-mayor kan Tinambac Camarines Sur asin consultant nin manlaen-laen na politiko. Siya an co-founder kan Camarines Sur Chamber of Commerce and Industry.


An sunod na nagadan, an popular na announcer na si David Dollano, 59, nagpoon kan AM programing sa FM radio, nagmukna kan Chika o Tsismis sa radyo, asin konsideradong Bikolista huli sa saiyang magayon na paggamit kan lenguaheng Bikolnon. Piglanatan siya kan gabos na estasyon na saiyang pigtrabahuhan asin konsideradong amigo kan gabos na politiko maski anong partido. Siya an solamenteng announcer sa Bikol na nag-recive nin royalty pay hali sa network na saiyang pigtrabahuhan.


Nagsunod an dai pig-aasahan na pagtalikod sa kinaban ni Larry Basmayor, 63, publisher kan Bicolhotline, naguin announcer sa DZGE, Vice-Mayor sa Minalabac, Secretary General kan Vice-Mayors’ League of Camarines Sur asin professional consultant nin may mga pangaran na politiko sa Manila arog ki Speaker Ramon Mitra, Senador Alfredo Lim, Senador Rodolfo Biazon asin Senador Bam Aquino.


An saro pang binawian nin buhay iyo an “midyet” kan broadcast media sa Naga na si Salvador “Buddy” Alcantara alyas Badong-Badong, announcer, dramatista, asin script writer/director. Nagtrabaho siya sa DSWD bilang supervisor asin permanenteng empleyado kun saen siya nag-retira nagkakapirang taon na an naka-agui.


Bago siya nagtalikod nag-pinchiter announcer pa siya sa DWEB-FM Rinconada.


Saro pang biglang nawara sa kinaban iyo si Vic David na may saderi kan Farm Radio sa Libmanan, Tarusanan, Camaligan asin Bombon Camarines Sur. Dati siyang chief technician kan sarong network digdi sa Naga antes siyang magsara-saderi.


An abo kan saiyang bankay inilulubong pa lang kan sarong semana iyo si Rhoniel Natira, 55, dating production manager kan ABS-CBN Naga, manager kan ABS-CBN MOR FM Radio asin sarong famusong DJ, parakanta, musikero (gitara, drums asin piano), voice-over announcer, composer, asin lyricist asin may sadering recording studio sa Magarao.


Pig-aapod siyang “Champ” kan saiyang mga katrabaho asin mga amigo huli ta bako lang siyang champion sa kawat na basketball kundi champion na makipag-barkada.


An pinaka-enot na editor-in-chief kan diyaryong ini Bicol Mail poon kan 1954, si Francis T. Nacianceno Jr kan banwaan na Libmanan, naguin enot na president kan Casureco I, consultant kan Napocor kan panahon nin Martial Law, labing sarong dekadang general manager kan Federation of Electric Cooperatives of the Philippines (FECOPHIL) asin naguin municipal secretary kan pinaka-dakulang banwaan kan provincia. Nagtapos sya nin BS Journalism sa Far Eastern University sa Manila. Natural na helang an saiyang ikinagadan.


An saindang biglang pagtalikod sa kinaban nagdulot nin grabeng kamunduan bako lang sa saindang pamilya, tagahanga asin ka-opisina kundi sa kinaban nin mass media sa Naga asin sa Bicolandia.