Grupo nin mga artista sa Partido area binilog
Ni Sonny Malate
GOA, Camarines Sur- Nabilog man giraray bilang sarong organisasyon an katiriponan nin mga individual na may talento sa iba-ibang linya nin arte na naggigikan sa Partido Area.
An paghimo na maorganisar ini haloy nang pigplano alagad ngonian sana nadagos sa esfuerzos ninda Peter Paul B. Hernandez, sarong paratukdo sa Partido State University (ParSU), Joseph Abella asin an kagsurat kaini. An tolo suportado kan sarong core group.
Durante sa initial na meeting kan grupo na pinangaranan na Partido Artists Group, pigtawan doon ni Dr. Lou Tagubhang, saro sa miembros kan core group, na mahalagang nasa tamang direction an organisasyon. Ini an maserbing giya sa pag-aram kun para sa ano, saen asin kiisay an pagmukna kan organisasyon.
Huli kaini, dakol pang mga policia, plano asin action an hihimohon kan grupo arog kan pagpili kan oficiales, paglatag kan constitution and by-laws asin posibleng pagparehistro sa Securities and Exchange Commission (SEC) asin iba pa.
An mga local artists naghahale sa man - iba-ibang linya nin arte arog kan Visual asin Performing Arts, Literary asin Media Arts asin Multi-Disciplinary Arts. Kadaklan sa mga ini an mga huben pa alagad mga ganador na sa patiribayan sa painting, filmmaking, photograpy, literatura asin iba pang competition.
Yaon si David Con Monserate Rivero, an famosong vlogger kan “Let’s Go Partido”. Dagdag pa iyo si Anthony Benz, editor-in-chief kan school publication kan Partido State University (ParSU) San Jose Campus, photo artist, filmmaker asin vlogger.
Dagdag pa sinda Ralph Amata Gonzales na an luna (moon) photos parating pigtatampok kan GMA network. Saro pa man an premyadong retratistang si Genevie Obias Estrella na conectado sa gobyerno provincial kan Camarines Sur ngonian.
Kairiba pa man sa grupo iyo an bistadong singer/composers na sinda Ildefonso Celocelo Jr.,. Eduardo “TJ” Arteche, Joseph Abella, Ledon Redita, Leonilo Palaypayon, Rye Rellora asin Dodong Valencia.
Sa ginibong Harana Festival 2024 sa banwaan kan San Jose, sinda Celocelo asin Arteche napiling recepientes kan primerong Honor de San Jose award.
Kabale siring man an mga book author asin multi-disciplinary artists na sinda Vincent M. Agravante, Jojit Cano, Dr. Lou Tagubhang, asin Dr. Kuh V. Paterno.
Hale sa academe yaon man sinda John Vincent Baylon, Omen Cano, Emmanuel Onsay, Marjun Sedeño, Lany Icamin, Frank Mabana asin dakol pa.
Manonotaran na an Partido Area kadakol na mga establisadong artists sa man - iba-ibang art genre arog ninda Pancho Piano, Ferdinand Dimadura, Atty. Gualberto Manlangit(+), Atty. Henry V. Briguera asin iba pa.
Mientrastanto, sa mga masunod na bulan ilalatag kan grupo an iba pang linyada kan mga actividades. Ini an actibo asin sustenidong iiimplementar para sa kapanibangan kan mga miembros asin comunidad.
Sa suporta kan mga Kasurog kan Arte asin comunidad mismo, naglalaom an bagong muknaon na grupo na an arte asin cultura sa Partido Area an magigin marambong, mabaskog asin bibo.
Core group na nagsusuporta sa pagbilog kan katiriponan nin mga man-iba-ibang artista sa Partido Area. (Photo: PAG)