Grupo nin mga imbestigador bibilogon para sa marikas na kaso vs reckless drivers

Ni Paulo DS. Papa

MAWOT kan manihamento kan Naga City Police Office na mag-organisar nin sarong grupo na matutuk sa mga vehicular incidents sa syudad kun haen biktima an mga pedestrian.

Iyan tanganing tolos na makumpleto an mga dokumentos na kaipuhan sa case folders laban sa mga drivers na nakakabudal nin pedestrian sa mismong designadong babalyuhan nin tinampo.

Ngonian, labi sa apat an nanutarang siring na insidente na kinagadan na ngani nin tolo na katao sa syudad nin Naga.

Kabale na diyan an sarong 19-anyos na Grade 12 student kan Camarines Sur National High School na nabudalan kan bulan nin Mayo sa pedestrian lane mantang nagbabalyo nin pedestrian lane tanganing magbakal nin kakanon sa sarong tindahan sa balyong tinampo sa Maharlika Highway, Barangay Concepcion Grande.

Kan Setyembre 19 nin maagahon na Domingo, kafiestahan na gayo kan Nuestra Señora de Peñafrancia, sarong 31-anyos na maestro kan nasambit na eskwelahan, na si Jao Mancera, nabudalan man sa parehong balyuhan sa MT. Villanueva Ave., Barangay Peñafrancia, parehong syudad.

Kan Oktubre 5, Lunes nin amay na aga, si Myrna Guaves, 82-anyos kan Barangay Concepcion Grande, nasambit na syudad, nagbabalyo sa pedestrian lane sa Maharlika Highway sa lugar hale sa mismong furniture store kan saiyang pamilya.

Nabudalan man kan marikas na auto na tolos kaining kinagadan.

An mga drivers na nakabudal sa mga nasambit na biktima nahahampang sa reklamong reckless imprudence resulting into homicide.

Si PCAPT Jonathan Hapa, an station commander kan Naga City Police Station 3, pigheras an orden ni PCOL Rizaldy Caballero, city police director kan syudad manungod sa pagbilog kan grupo na maturuwangan sa pagkompleto nin dokumentos na kaipuhan sa pagsunad nin kaso laban sa siring na mga driver.

Kabale na diyan an pagtipon kan mga ebidensya, mga salaysay kan testigo asin iba pang pighahagad sa piskalya para sa prosidimento antes na maisakat sa korte.

Sa paaging ini, mapaparikas an pagbilog kan case folder tanganing matawan tolos nin hustisya an pagkagadan kan mga pedestrian na biktima kan reckless driving.

Matatandaan, an National Police Commission nadiskubre an procedural lapses sa kaso kan maestro dahil sa naabalang dokumentasyon sa insidente.