GRUPO NIN TRANSPORTE SA BICOL, SINIKWAL AN JUELGA: Suspension kan klase sa Ciudad nin Naga, iginilid
Sa atubang kan homa kan sektor nin transporte para sa ‘‘tigil-pasada vs jeepney phase-out’’, iginilid kan Department of Education (DepEd) sa Ciudad nin Naga an posibleng pagsuspendi nin klase sa laog nin sarong semana poon kan Marso 6, 2023.
An City Hall asin Naga City Police Office nag-andam kan saindang libreng sakay encaso maparalisar an viaje kan jeepney alagad antes kan Marso 6 an sektor nin transportante naglinaw na mayo sindang plano na magsabay sa ‘‘tigil-pasada’’ sa Metro Manila.
Si Manny De Guzman, School Division Superintendent kan DepEd Naga, nagpahayag sa Bicol Mail ini an saindang basehan na mayong mangyayaring suspension nin klase matapos magkumfirmar an sektor nin transporte sa Bicol na dai sinda maparticipar sa tigil pasada vs jeepney phase-out.
Sinabi pa kan DepEd na nasa recovery period na an face-to-face classes kan mga estudiantes sa elementarya asin secondarya kaya ngani an saindang ahencia iginilid an suspension sa klase.
An estudiantes kan DepEd Naga labi sa 50 mil poon sa kindergarten, elementarya asin secondary.
Sa pinaluwas na press statement kan grupo nin transporte sa Bicol sinabi sa English ‘‘In behalf of the different transport leaders, bus in all six provinces in the Bicol Region, we will not participate in the scheduled transport strike that will start tomorrow March 6, 2023 .’’
An press statement pirmando ninda Exequil Longares, National President, UV express national alliance of the Philippines; Joemil Mujar, chairman, Bicol Intercity Transport Cooperative, President, Bicol Bus integrated Operators Association; Tomas Magallon, Acting Regional Pres. Bicol Jeepney Drivers and Operators Association; asin Domingo Arango, Secretary General, Bicol Jeepney Drivers and Operators Federation.’’
An isyu sa modernization program ma-limang taon nang planong iimplementar alagad tinawan pa sinda nin panahon nganing magrehistro sa Cooperative Development Authority hasta sa Deciembre 30, 2023 na iyo an pigtalaan na plaso kan Land Transportation Franchising and Regulatory Board.
Nagkontra an kadakli sa jeepney huli kan dakulang cantidad na puedeng aboton hasta sa tres milyones pesos. (dpa)