Guerilla Museum Sa Fundado

Sayang mayo na an satuyang mga Magurang, mayo na an satuyang mga Ninuno, dai na ninda nahiling an mga lumang armas, mga lumang bayonita, mga lumang helmet asin mga mapa kan Naga na pig istaran kan mga soldados hapones durante kan WW2. Sa pinaka premirong pagkakataon, igua nang museum na mahihilingan kan mga bagay bagay na may koneksyon sa giyera kan mga hapon na nagpasakit sa mga bikolano, marhay na sana ta isinalbar kita ni Gen. Douglas Mc Arthur na iyo ang nanginotan sa mga Amerikano sagkod na mag surrender an mga hapon na pinamayuhan ni General Yamashita.

Kan Nakaaging Domingo, Noviembre 30, naimbitaran an samuyang grupo sa Sumaro Bikolnon na mag atender sa sarong sadit na Book Launching kan sarong libro manonongod sa ayam na nabuhay kan panahon nin kastila. An libro pig surat ni Ian Bermudo Alfonso, sarong History Professor kan UP Diliman. Si Prof. Alfonso sarong Bikolano-Pampanguenio ta an saiyang ina tubong Dinaga Canaman asin an saiyang Ama taga duman sa Macabebe Pampanga. Sa malipot na sadit na Seminar Room na yaon sa compound kan Bicol Guerilla Museum and Memorabelia na iguang address sa River Side, Brgy. Fundado, Canaman, Camarines Sur na an may sadiri asin nagmamanehar iyo an mag agom na Historian Danny asin Karen Gerona. An objetibo kan libro manonongod sa ayam iyo an makanood kita na magpadangat sa ayam na ngonian inaapod na “Aspin”, Asong Pinoy, asin dai na pig aapod na Askal, iyan basado sa kasuguan kan Philippine Animal Welfare Society (PAWS). Ipinahiling sa libro ni Prof. Alfonso, an mga ladawan asin agi agi kan mga aspin o ayam durante kan panahon nin kastila, na sinda namumuhay man nanggad sa mga tinampo asin kaiba iba kan mga tawo maging kastila o mga pinoy. Alagad an saro sa magayon na experiencia kan samuyang grupo na pinanginotan ni Sumaro Bikolnon President Ramon Olano, yaon man si Architech Rommel Alanis, Councilor Nathan Sergio, Architect Professor Kenneth Orasa, Journalist Bong Franco, Ateneo Professor Bert Baloloy, Mrs Pilar Datu De Guzman, former President kan Nueva Caceres Heritage na kakaabot pa sana hale sa Vancouver Canada asin mga estudyante kan Ateneo de Naga History. Iyo an kami naka abot asin nakalaog sa magayon na “museum” na iyo an iguang koleksyon kan mga istorya kan ralaban kan hapon asin mga gerilya asin amerikano durante kan WW2. Sa saindong paglaog sa Guerilla Museum saimong mamatean ang mga agi agi kan satuyang mga ninuno na nabubuhay sa kahaditan huli sa peligro na gibohon kan mga soldados hapones. An Bicol Guerilla Museum and Memorabelia yaon sa harayong lugar kan Fundado ta mayong opisyal kan City Hall, ang nangitorogan na magka iguang siring na Museum sa Naga Kundi ang museum ni Jesse Robredo. Magayon magpasyar sa museum ni Danny Gerona ta ini harani sa approach kan Skybridge o tulay na magsusugpon kan Libmanan asin Barobaybay na sakop kan Magarao. Mafresko an Guerilla Museum ta igua ining mga poon nin fruit trees asin kataid kaini an mga tanom na Nipa asin tanaw ang mahiwas na Bicol River. An mga nagpapasyar sa museum na kadaklan mga estudyante, puedeng magpaluto nin merindalan o pangodtohan dependa sa job order. Dakula an samuyang pagpa Dios Mabalo sa mag agom na Danny asin Karen Gerona ta pig luwagan kami nin dakul na Pancit-Bijon na gulping gulay asin maragsik na lechon, igua pang masiramon na cassava cake, asin club house nin darakulang tinapay na may palaman nin ham, pipino , asin lettuce, asin lalong masiram sa mga malipot na juice asin mainit na kape. Tunay na maogma an magpasyar sa Bicol Guerilla Museum and Memorabelia.