Gulay Naga pigtutulod ni dating Consejal Lavadia

Pigtutulod ni dating Consejal asin ngunian Consultant kan City Agriculture Office (CAgO) kan City Hall an ‘‘Gulay Naga Program’’ nganing magpabakal nin baratong presyo nin produkto sa agricultura.

An mga gulay dapat isuplay sa 50,000 na household kan 27 barangay kan ciudad alagad seseguradohon na hale sa organikong pagtanum.

Si Lavadia asin Ernesto Asense III, jefe kan CAgO kan lokal na gobierno kan ciudad nagkaulay kan programa na kaipuhan sanang pagkasararoan an iniciativong nganing mas mapalangkaw pa an produkto gugulayon sa paagi kan organic farming.

Igua nang sarong pribadong organisasyon maging kan fishery council na katuwang an CAgO consultant na mawot magtabang nganing suportaran an paraoma sagcod na mapapusog an Gulay Naga Program.

An Department of Agriculture Bicol nagsusuporta sa programa na pwede pang maka-engkaminar sa jovenes nganing mag-envuelto sa agricultura. Sa nagluwas na pag-aadal kan UP Los Baños sobra sa 65 por ciento kan mga Pilipinong paraoma mayo nang kaisipan na magsunod sa saindang magurang na paraoma sa dahilan na mapagal asin mayong dakulang ingreso o dai mayaman.

Bako lang paraoma an matatabangan envez mga consumedores huli ta makakabakal sinda nin gulay na pinataba sa paagi kan organic farming na dai naggagamit nin kemikal panlaban contra sa mga insekto sa tinanum.

Mga pigtitiendang gulayon sa ika-tolong escalon kan Naga City People’s Mall hale sa upper barangay kan Ciudad nin Naga kadakle hale sa ibang mga banwaan. (Bicol Mail)