GUN BAN PIG-IIMPLEMENTAR KAN NCPO: PNP andam na sa seguridad sa Traslacion prosisyon
Nakaandam na sa seguridad an Naga City Police Office sa suporta kan augmentation force kan PNP Regional Office 5 nganing magmantenir sa paz y orden sa nakatalaan na traslacion procession sa Viernes, Septiembre 11 asin sa bilog na festividad ni Ina.
An Archdiocese of Caceres nangapudan man sa voyadores para sa seguridad asin solemle kan traslacion prusisyon hale sa lomang Peñafrancia Shrine hasta sa Naga Metropolitan Cathedral sa tahaw kan pagsungko kan ribo-ribong debotos ni Ina.
Si PBGen Randy Glenn Silvio, regional director kan PRO5 nagtao nang mga instruksyon sa NCPO sa pamamayo ni PCol. Rizaldy Caballero sa pagtarabangan ninda asin PNP augmentation force para sa seguridad kan ribo-ribong debotos ni Ina asin ni El Divino Rostro. Sinda magiging presente sa Ciudad nin Naga sa bilog na festividad ni Ina.
Magiging presente sa traslacion prosisyon an jefe kan PNP Bicol, City Director kan NCPO asin iba pang opisyal nin awtoridad.
Estrictong iimplementar kan mga awtoridad an gun ban na epektivo kan Septiembre 5 hasta Septiembre 21, 2026 para maseguro an seguridad sa festividad ni Ina. Alagad dai kabale digdi si mga nakauniformeng awtoridad.
An fuersa kan augmentation force hasta sa pagmantenir kan seguridad sa fluvial procession sundo sa kafiestahan ni Ina. Bako lang madedestino sa prosisyon alagad maging sa trafico, sa simbahan sa mga matatawong lugar kan ciudad maging sa mga terminal para man sa seguridad kan nag-aarabotan na debotos.
An pamayo kan Bicol PNP naging presente sa ginibong Peñafrancia 2026 Multi-Agency Coordination Group Memorandum of Understanding na nagperirmahan kan Septiembre 2 na ginibo sa Archbishop Leonardo Legazpi DD Hall Minore and National Shrine. Kabale sa perirmahan si Silvio, Alcalde Leni Robredo, Most Rev. Rex Andrew C. Alarcon kan Caceres,iba pang opisyales kan City Hall, PRO5, BFP, Coast Guard, asin Public Safety Office kan ciudad.
Comments