Gun ban sa Peñafrancia fiesta dai pa maimplementar kan NCPO

Pigseguro kan Naga City Police Office (NCPO) na saindang estricto iimplementar na an gun ban na dapat mag-epekto kan Septiembre 5 hasta 25, 2022 nganing maseguro an pagmantenir kan paz y orden sa panahon kan Festividad ni Ina alagad hinahalat nalang ninda na ma-aprubaran kan Camp Crame sa paagi ni PGen Rodolfo Azurin.

Hinahagad kan Sangguniang Panlungsod na ngunian panahon na mga actividades sa kapiestahan ni Ina dapat ideclara kan PNP Chief an gun ban sa ciudad sa peryodo kan kapiestahan.

Si City Director P/Col. Nelson Pacalso, City Director kan NCPO nagpahayag na dai pa ninda estrictong maimplementar an gun ban sagcod na mayo pang direktiva an saindang higher command.

Kun aprubaran dae kabale sa gun ban an mga uniform personnel kan PNP, Philippine Army, grupo kan augmentation force asin iba pang ahencia kan awtoridad.

An gun ban taon-taon sa panahon kan Peñafrancia fiesta pig-iimplementar na ini kan NCPO na aprubado kan Camp Crame.

Ngunian na taon si Consejal Omar Buenafe, chairman kan Committee on Public Safety iyo padreno kan resolusyon na sinuportaran kan gabos na miembros Sangguniang Panlungsod.

An grupo kan augmentation force kabale sa mamantenir nganing maseguro na magiging solemene an dalagan kan traslascion procession sa Septiembre 9 asin fluvial procession sa Septiembre 17.

Afuera pa kaini City Hall nakatalaan iimplementar an liquor ban sa panahon kan mga prusesyon ki Ina. (dpa)