top of page

Hababang tarifa nin kuryente kan Casureco II pigcuestion kan ERC

Paborable sa miembros-consumedores kan Camarines Sur II Electric Cooperative (Casureco II) an naging desisyon sa paghuros kan tarifa sa kuryente asin iyo na an pinakababa sa nasyon alagad cuestionable sa Energy Regulatory Commission mala ngani nag-isyu nin show cause order contra sa cooperativa nganing magpaliwanag.


Si Rinner Bucay, opisyal na parataram kan Casureco II nagpahayag sa Bicol Mail na pig-aandam na kan manijamieno nganing simbagon asin magpaliwanag sa ERC.


Kinumfirmar kaini, na nag-isyu sa sainda nin show cause order si ERC Chairman Mona Dimalanta nganing magpaliwanag kun tano na nag-implementar kan sunod-sunod na paghuros kan tarifa apesar na mayong aprubal sa saindang opisina.


‘‘Sain na kami maduman apesar na paborable sa labi sa 120 mil na consumedores kan cooperativa alagad pigcucuesion kan ERC an saindang desisyon,’’ sabi pa kan Casureco II.


Sa paliwanag kan cooperativa, sinabi pa na si dating halangkaw na tarifa hali sa P17.00 alagad sa ngunian cantidad na sanang P6.00 na pigpasunod kan bulan nin Agosto hasta sa ngunian.


Si dating VP Leni Robredo kan bulan nin Marso 2023 pig-imbitaran si Chairman Dimalanta nganing maghampang sa manihamiento asin stakeholder sagcod nadiscobre na halangkawon an saindang tarifa asin an aksyon kan ERC magbawas tarifa. Alagad an roll back sa tarifa sa ngunian bako man sa desisyon kan ahencia kan Abril 17, 2023.


An dahilan kan paghuros nin tarifa huli kan nagparababa man si tarifa sa generator charge kan power suppliers sa mga cooperativa nin electricidad bako lang kan Casureco II envez iba pang mga cooperativa. Afuera pa kaini naghuros man si presyo sa oring na ginagamit kan mga power suppliers hali sa 500 hasta sa labi na sana sa 100 dolyares cada metrico tonelada.


Ngunian na Septiembre 2023 an tarifa sa residential nagcacantidad nin P6.8851/Kwh; P6.0098/Kwh sa commercial asin sa industrial cantidad P5.306/kWh.

Kommentare


bottom of page